პირველი ქართული YouTube რეალითი შოუ Creator-ის გამარჯვებული მალე გახდება ცნობილი. საქართველოს ბანკის პროექტი, რომელიც მიზნად ისახავს ქართული YouTube ეკოსისტემის გაძლიერებას, 8 ეპიზოდის განმავლობაში მაყურებელს საინტერესო გამოწვევებს სთავაზობდა და გამოცდილი კრეატორების რჩევებს უზიარებდა.

პროექტის ერთ-ერთი ფინალისტი კი ომარ კაკუშაძეა (WildDoc), რომელიც პროექტში მიღებული გამოცდილების შესახებ გვესაუბრება.

რას ნიშნავს თქვენთვის Creator-ის ფინალისტებს შორის მოხვედრა და როგორ ემზადებით ბოლო ტურისთვის?

კრეატორის ფინალისტობა ჩემთვის უდიდესი გამოწვევა, პასუხისმგებლობა და ემოციების ზღვაა. თითოეულმა ტურმა მომცა გამოცდილება, რაც დამეხმარა აქამდე მოსვლაში.

ფინალური ტურის მთავარი დავალება უკვე შესრულებულია და მოუთმენლად ველოდები საფინალო შეხვედრას.

პროექტის ფარგლებში მიღებული გამოცდილება რომ გაგვიზიაროთ — რომელი დავალება იყო თქვენთვის გამორჩეული?

ჩემთვის ყველაზე საინტერესო იყო საფინალო დავალება რამდენიმე მიზეზის გამო: პირველი და ყველაზე მთავარი არის ის, რომ ქართველ ჰალკთან (ლევან საგინაშვილთან) კოლაბორაციის შესაძლებლობა მომეცა. ასევე, ვისწავლე ერთდროულად რამდენიმე კამერასთან მუშაობა. და, რაც მთავარია, შეიქმნა WILD Production, რომელიც პროექტში ჩემი გამარჯვების შემთხვევაში აქტიურად გააგრძელებს მსგავსი კონტენტის კეთებას.

შედეგად, პროექტის განმავლობაში მიღებულმა გამოცდილებამ მომიმატა თავდაჯერებულობა და რწმენა იმისა, რომ შესაძლებლობები უსაზღვროა, უბრალოდ მონდომებაა საჭირო.

იყო თუ არა რჩევა, რომელიც განსაკუთრებულად დაგამახსოვრდათ?

ყველაზე მეტად დამამახსოვრდა ერთ-ერთ ეპიზოდში კაკოს შეფასება: თამბნეილი" და სათაური შინაარსობრივად არ უნდა მეორდებოდეს და უნდა იყოს ინტრიგნული, რათა ჩაითრიოს მაყურებელი. ეს სიტყვები თითოეული ვიდეოს აწყობისას თავში მიტრიალებდა.

თქვენი აზრით, რა ღირებულებას ქმნის პროექტი Creator ქართული YouTube ეკოსისტემისთვის?

ქართული Youtube ახლა ვითარდება, ასეთი პროექტების არსებობა კი ძალიან მნიშვნელოვანია, რადგან ხელს უწყობს იმას, რომ Youtube ეკოსისტემა გახდეს უფრო მრავალფეროვანი, რაც გამოიწვევს ქართველი მაყურებლების მეტ ჩართულობასა და რიცხობრივ ზრდას.
რა რჩევას მისცემდით დამწყებ კრეატორებს — რა არის მნიშვნელოვანი წარმატებისთვის?

ყველა დამწყებ კრეატორს ვურჩევ, რომ კონტენტში იყვნენ თავისუფლები, ნამდვილები და აკეთონ ის, რაც უყვართ. რადგან წარმატებისთვის მთავარია კამერის წინ იყო ნამდვილი და შემდეგ ყველაფერი გამოდის.