აშშ-ის პრეზიდენტი დონალდ ტრამპი საფრანგეთის ღვინოებსა და შამპანურზე 200%-იანი ტარიფის დაწესებით მას შემდეგ დაიმუქრა, რაც გავრცელდა ინფორმაცია, რომ საფრანგეთის პრეზიდენტმა ემანუელ მაკრონმა მის მიერ შეთავაზებულ "მშვიდობის საბჭოში" (Board of Peace) გაწევრიანებაზე უარი თქვა. ამის შესახებ ინფორმაციას Deutsche Welle ავრცელებს.

ტრამპმა ტარიფების დაწესების მუქარა პირდაპირ დაუკავშირა მაკრონის გადაწყვეტილებას, არ ჩაერთოს ამ გაერთიანებაში, რომელსაც აშშ-ის პრეზიდენტი გლობალური კონფლიქტების მოგვარების პლატფორმად წარმოადგენს.

გეგმის მიხედვით, საბჭოს გრძელვადიან წევრებს სამი წლის შემდეგ წევრობის გაგრძელების შემთხვევაში ფონდში 1 მილიარდი დოლარის შეტანა დაეკისრებათ. ფონდს თავად ტრამპი უხელმძღვანელებს.

საინფორმაციო სააგენტო AFP-ის ინფორმაციით, მაკრონთან დაახლოებულმა წყარომ ორშაბათს განაცხადა, რომ საფრანგეთი "არ აპირებს დადებითად უპასუხოს" მოწვევას. AFP-მ სამშაბათს ასევე მოიყვანა მაკრონთან დაახლოებული სხვა წყაროს ინფორმაცია, რომლის თქმითაც საგარეო პოლიტიკაზე ზემოქმედების მიზნით ტარიფების მუქარა "მიუღებელი და არაეფექტიანია".

ჯერჯერობით "მშვიდობის საბჭოში" გაწევრიანების მოწვევა დაახლოებით 60 ქვეყნის ლიდერს აქვს მიღებული.

ცნობისთვის, ტრამპმა "მშვიდობის საბჭოს" შექმნის იდეა პირველად გასული წლის სექტემბერში წამოაყენა, როდესაც ღაზაში ომის დასრულების გეგმებზე საუბრობდა. გასულ კვირას მსოფლიო ლიდერებს გაგზავნილ მოწვევებში აღნიშნული იყო, რომ საბჭოს მანდატი გაფართოვდებოდა და მსოფლიოს მასშტაბით კონფლიქტების მოგვარებას მოიცავდა.

ასევე, გავრცელდა ინფორმაცია, რომ მაკრონმა ტრამპს პირადი შეტყობინება გაუგზავნა და შესთავაზა, ხუთშაბათს პარიზში G7-ის სამიტის ორგანიზება, სადაც რუსეთს შეხვედრაზე დამკვირვებლის სტატუსით მიიწვევდნენ. მაკრონმა ასევე გამოთქვა სურვილი, სამიტზე მიწვეული ყოფილიყო უკრაინა, ასევე დანია — ეს იმის ფონზე, როდესაც ტრამპი გრენლანდიის ხელში ჩაგდების მუქარას აჟღერებს.