სახალხო დამცველის აპარატის ინფორმაციით, ლევან იოსელიანმა საკონსტიტუციო სასამართლოში "შეკრებებისა და მანიფესტაციების შესახებ" კანონში შეტანილი ცვლილებები გაასაჩივდა/

ომბუდსმენის განცხადებაში ვკითხულობთ, რომ აპარატმა აქციაზე სახის დაფარვის აკრძალვა, ადმინისტრაციულ დანაშაულზე აღმკვეთი ღონისძიებები და, დანაშაულის განმეორებით ჩადენის შემთხვევაში, სისხლის სამართლებრივი დევნის დაწყება სადავო ცვლილებად მიიჩნია.

"საქართველოს სახალხო დამცველმა საქართველოს საკონსტიტუციო სასამართლოს კონსტიტუციური სარჩელით მიმართა, რომლითაც გასაჩივრებულია "შეკრებებისა და მანიფესტაციების შესახებ" საქართველოს კანონით შეკრების ან მანიფესტაციის მონაწილეთათვის განსაზღვრული აკრძალვები, მათ შორის, სახის ნიღბით ან ნებისმიერი სხვა საშუალებით დაფარვის ბლანკეტურად აკრძალვა.

შეკრებისა და მანიფესტაციის ჩატარების წესებთან დაკავშირებულ შინაარსობრივ აკრძალვებთან ერთად, კონსტიტუციურ სარჩელში სადავოდ არის გამხდარი საქართველოს ადმინისტრაციულ სამართალდარღვევათა კოდექსით გათვალისწინებული პასუხისმგებლობის შემადგენლობა, როგორც უალტერნატივო პატიმრობა, ისე კანონით გათვალისწინებული ჯარიმის ოდენობა.

ამასთან, საკონსტიტუციო სარჩელით სადავოდ არის გამხდარი საქართველოს სისხლის სამართლის კოდექსით დაწესებული სისხლისსამართლებრივი პასუხისმგებლობა, რომელიც ადმინისტრაციულ სახდელდადებული პირის მიერ იმავე ქმედების განმეორებით ჩადენისათვის შეკრების ან მანიფესტაციის მონაწილის, მათ შორის, არასრულწლოვანისა და ორგანიზატორის მიმართ დაწესებული თავისუფლების აღკვეთას ითვალისწინებს," — ვკითხულობთ განცხადებაში.

29 დეკემბერს, ლევან იოსელიანმა კვირის პალიტრასთან ინტერვიუში განაცხადა, რომ აპარატმა "შეკრებისა და მანიფესტაციების შესახებ" კანონში შეტანილი ცვლილებებთან დაკავშირებით ეუთო/ოდირს მიმართა, რომელმაც საკანონმდებლო ცვლილებები კრიტიკულად შეაფასა.