სახალხო დამცველმა, ლევან იოსელიანმა კვირის პალიტრასთან ინტერვიუში ოცნების პარლამენტის მიერ დემონსტრაციების შემზღუდველი კანონების საკონსტიტუციო სასამართლოში გასაჩივრებაზე ისაუბრა.

იოსელიანმა განაცხადა, რომ აპარატმა შეკრებისა და მანიფესტაციების შესახებ" კანონში შეტანილი ცვლილებებთან დაკავშირებით ეუთო/ოდირს მიმართა, რომელმაც საკანონმდებლო ცვლილებები კრიტიკულად შეაფასა. ომბუდსმენის შეფასებით, ნიღბის აკრძალვა შეკრებისა და მანიფესტაციის კონტექსტში არაპროპორციული შეზღუდვაა და ეს საკითხიც იქნება საკონსტიტუციო სარჩელის ერთ-ერთი ნაწილი.

"შეკრებისა და მანიფესტაციების შესახებ" კანონში შეტანილი ცვლილებები რამდენიმე ეტაპად იქნა მიღებული. ჩვენ მივმართეთ ეუთო/ოდირს, რომ შეეფასებინა საკანონმდებლო ცვლილებების პაკეტი და ეს ცვლილებები საკმაოდ კრიტიკულად შეაფასა. ამჟამად ამ შეფასებებზე დაყრდნობით, მათ შორის ცვლილებების სამართლებრივი შინაარსის გათვალისწინებით, ვმუშაობთ საკონსტიტუციო სარჩელის შინაარსზე. საკმარისი სამართლებრივი არგუმენტაციის არსებობის შემთხვევაში, საკონსტიტუციო სასამართლოში წარვადგენთ სასარჩელო მოთხოვნას.

ნიღბის აკრძალვის თაობაზე თავის დროზე განცხადებაც გავაკეთეთ და ეს რეგულაცია უარყოფითად შევაფასეთ. შესაძლოა არსებობდეს სრულიად ობიექტური მიზეზი, რის გამოც აქციის მონაწილისთვის ნიღბის ტარება აუცილებელიც კი იყოს. მაგალითად, მას შეიძლება ჰქონდეს ჯანმრთელობის პრობლემა და ნიღაბი დაცვის ერთ-ერთი მთავარი საშუალებაა. შესაბამისად, ნიღბის აკრძალვა შეკრებისა და მანიფესტაციის კონტექსტში არაპროპორციული შეზღუდვაა. ეს საკითხიც იქნება ჩვენი საკონსტიტუციო სარჩელის ერთ-ერთი ნაწილი. ამასთანავე, უნდა გავითვალისწინოთ, რომ შეკრება არ გულისხმობს მხოლოდ პარლამენტის წინ ხელისუფლების საწინააღმდეგო აქციებს. შეკრება ნიშნავს საქართველოს ნებისმიერ ტერიტორიაზე მოქალაქეების მიერ სხვადასხვა სოციალური საკითხის შესახებ აზრის თავისუფლად გამოხატვის შესაძლებლობას. ეს კანონი ყველა ასეთ შეკრებას ეხება. საბოლოო ჯამში, ეს ცვლილებები არა მხოლოდ არ აუმჯობესებს, არამედ ამძიმებს კიდეც ადამიანის უფლებების მდგომარეობას," — განაცხადა იოსელიანმა.

ომბუდსმენმა ინტერვიუში ასევე ადმინისტრაციული დაკავებებზე და ჯარიმებზე ისაუბრა. იოსელიანის განცხადებით, ადმინისტრაციული დანაშაულის შემთხვევაში დაკისრებული ჯარიმების ზრდა მოქალაქეების ფინანსურ მდგომარეობაზე მძიმედ აისახება.

"სასამართლო გადაწყვეტილებების მონიტორინგს ჩვენ არ ვახორციელებთ, თუმცა შეგვიძლია ვისაუბროთ არსებულ ტენდენციებზე. მაგალითად, ჩემი დაკვირვებით, 2023-2024 წლებში ადმინისტრაციული პატიმრობა, როგორც ადმინისტრაციული სასჯელის ფორმა, სასამართლოებში შედარებით იშვიათად გამოიყენებოდა, 2025 წელს კი როგორც ადმინისტრაციული პატიმრობის გამოყენების რაოდენობა, ისე მისი ხანგრძლივობა მნიშვნელოვნად გაიზარდა. თუ წინა წლებში სასამართლო ხშირად შემოიფარგლებოდა გაფრთხილებით ან ჯარიმით, 2025 წელს ადმინისტრაციული პატიმრობის გამოყენების მაჩვენებელი გაცილებით მაღალია. ამასთანავე, მნიშვნელოვნად გაიზარდა ჯარიმების ოდენობაც - თუ ადრე ჯარიმა 500 ლარს შეადგენდა, დღეს ის 5.000 ლარამდეა გაზრდილი. ჯარიმების ასეთი არაპროპორციული ზრდა, ბუნებრივია, ძალიან მძიმედ აისახება მოქალაქეების ფინანსურ მდგომარეობაზე," — აღნიშნა ომბუდსმენმა.

შეგახსენებთ, სახალხო დამცველი ლევან იოსელიანი ქართული ოცნების პარლამენტის მიერ დემონსტრაციების შემზღუდველ კანონებს საკონსტიტუციო სასამართლოში გაასაჩივრებს. ამის შესახებ "პირველი არხის" ეთერში განაცხადა. მისი თქმით, აღნიშნული საკანონმდებლო ცვლილებები ეუთო-ოდირმა ნეგატიურად შეაფასა და კონსტიტუციას ეწინააღმდეგება კანონს, რომელიც აქციაზე მყოფ ადამიანებს, განურჩევლად საჭიროებისა, ნიღბის გამოყენებას უკრძალავს.