2017 წელს Netflix-ზე გამოსულმა გერმანულმა სერიალმა Dark სწრაფად დაამსხვრია წარმოდგენა იმაზე, როგორი შეიძლება იყოს არაინგლისურენოვანი სატელევიზიო ჰიტი. სამი სეზონის განმავლობაში (2017–2020) Dark იქცა ერთ-ერთ ყველაზე ჩახლართულ, ინტელექტუალურ და ამბიციურ სერიალად სტრიმინგის ეპოქაში, პროექტად, რომელიც მაყურებლისგან სრულ კონცენტრაციას ითხოვს.

დროის მარყუჟები, პარალელური სამყაროები, თაობებს შორის გადახლართული ოჯახური კავშირები და სიუჟეტი, რომელიც თითოეულ დეტალს მნიშვნელობას ანიჭებს, Dark-ს მარტივად საყურებელ სერიალად არ აქცევს. პირიქით, ის ითხოვს ჩაღრმავებას, ჩანაწერებს, დიაგრამებს და ხშირ შემთხვევაში ხელახლა ნახვასაც.

მილიონობით მაყურებლით, სერიალი მუდმივად ხვდებოდა Netflix-ის ყველაზე პოპულარულ არაინგლისურენოვან შოუებს შორის და დღემდე ხშირად ფიგურირებს "ყველა დროის საუკეთესო სერიალების" სიებში.

ამ წარმატებამ ბუნებრივად გააჩინა კითხვა: რა ბედი ეწიათ სერიალის მსახიობებს მას შემდეგ, რაც დროის ციკლი საბოლოოდ დაიხურა? ზოგმა მსახიობმა Dark საერთაშორისო სცენაზე გასასვლელ პლატფორმად გამოიყენა, ზოგმა საავტორო კინოში გააგრძელა გზა, ზოგი კი პოპულარობის მიუხედავად ეკრანს საერთოდ ჩამოშორდა.

ლიზა ვიკარი (მართა ნილსენი)

Dark-ის შემდეგ ქასთიდან ყველაზე თვალსაჩინო საერთაშორისო ნაბიჯი სწორედ ლიზა ვიკარმა გადადგა.

მისი კარიერის ახალი ეტაპი დაიწყო Hijack-ის მეორე სეზონით (2026), ეს მისი პირველი მსხვილი ინგლისურენოვანი როლია, სერიალში მთავარ როლს იდრის ელბა თამაშობს. ვიკარი საერთაშორისო ქასთში გამოჩნდა, რაც მკაფიოდ მიუთითებს მის გადასვლაზე გერმანული ბაზრიდან გლობალურ სცენაზე. თავად სერიალი Apple TV+-ის ერთ-ერთ ყველაზე ნახვად თრილერად რჩება, ეს ის მომენტია, როცა Dark-ის მსახიობი რეალურად "ტოვებს" ევროპულ ჩარჩოს.

ამასთან ერთად, ვიკარი არ ჩამოშორდა არც გერმანულ კინოს. Netflix-ის რომანტიკულ კომედიაში Isi & Ossi (2020) მან სრულიად განსხვავებული, მსუბუქი იმიჯი წარმოაჩინა, ფილმი გერმანიაში ჰიტი გახდა და ხშირად "ანტი-Dark"-ადაც მოიხსენიებენ. დამოუკიდებელ დრამაში Hannes (2021) კი კრიტიკოსებმა მისი ემოციურად შეკავებული თამაში განსაკუთრებით შეაქეს, რაც აჩვენებს, რომ ვიკარი მხოლოდ სერიალების ვარსკვლავი არ არის.

ლუის ჰოფმანი (იონას კანვალდი)

თუ ლიზა ვიკარმა საერთაშორისო ექსპანსია აირჩია, ლუის ჰოფმანი საპირისპირო გზას გაჰყვა: ნაკლები ხმაური, მეტი კონტროლი.

მისი ყველაზე მნიშვნელოვანი როლი Dark-ის შემდეგ არის Der Passfälscher (2022). ჰოფმანი თამაშობს ციომა შონჰაუსს, ებრაელ ახალგაზრდას, რომელიც ნაცისტურ გერმანიაში ყალბ პასპორტებს ამზადებდა. ფილმმა გერმანიაში დიდი გამოხმაურება მოიპოვა და სწორედ ამ როლმა დაადასტურა, რომ ჰოფმანი რჩება სერიოზულ კინომსახიობად და არა მხოლოდ სერიალის ვარსკვლავად.

2023 წელს ის ასევე გამოჩნდა საერთაშორისო ისტორიულ დრამაში Seneca, ჯონ მალკოვიჩთან ერთად, მეორეხარისხოვანი როლით, მაგრამ საერთაშორისო კონტექსტში მნიშვნელოვანი მონაწილეობით.

2024 წელს მან ითამაშა თრილერ-დრამაში Fresh, სადაც მთავარ პერსონაჟს, კაის ასახიერებს. ჰოფმანი შეგნებულად არ დაბრუნებულა სტრიმინგ-სერიალებში და აქცენტი ისტორიულ, ბიოგრაფიულ და არაკომერციულ როლებზე გააკეთა. Dark-ის დასრულების შემდეგ მან არ აირჩია სწრაფი სატელევიზიო წარმატება და ეს არჩევანი მის კარიერაში მკაფიოდ იკითხება.

ოლივერ მასუჩი (ულრიხ ნილსენი)

ოლივერ მასუჩი Dark-ის შემდეგაც ერთ-ერთი ყველაზე აქტიური მსახიობია, თუმცა აქცენტი ისევ გერმანულ კინოსა და სერიალებზე გააკეთა.

Netflix-ის პოსტაპოკალიფსურ სერიალში Tribes of Europa (2021) ის მეორეხარისხოვან, მაგრამ დასამახსოვრებელ როლში გამოჩნდა, ეს სერიალი Dark-ის შემდეგ გერმანული სამეცნიერო ფანტასტიკის გაგრძელების ერთ-ერთი მცდელობა იყო.

მისი კარიერის პიკად კი ბევრისთვის რჩება Enfant Terrible (2020) რაინერ ვერნერ ფასბინდერის ბიოგრაფიული ფილმი, სადაც მასუჩი მთავარ როლშია. კრიტიკოსების შეფასებით, ეს მისი ერთ-ერთი ყველაზე რთული და ძლიერი შესრულებაა.

მარკ ვაშკე (ნოა)

ნოას შემსრულებელი მარკ ვაშკე Dark-ის შემდეგ არ ქცეულა სტრიმინგის ვარსკვლავად და ეს სრულიად შეგნებული არჩევანია.

ვაშკე თამაშობს ცნობილ გერმანულ კრიმინალურ სერიალში Tatort. ეს სერიალი გერმანიის ყველაზე პოპულარული და ხანგრძლივი კრიმინალური სატელევიზიო ფრენჩაიზია.

ვაშკე პირველ რიგში თეატრის მსახიობია, ის ერთ-ერთი წამყვანი ფიგურაა ბერლინის Schaubühne-ში და რეგულარულად თამაშობს კლასიკურ, პოლიტიკურ და ექსპერიმენტულ სპექტაკლებში. კინოში კი მხოლოდ შერჩევით, საავტორო პროექტებში ჩნდება, სადაც ინტელექტუალურ და მორალურად გაურკვეველ პერსონაჟებს ანიჭებს უპირატესობას.

დაან ლენარდ ლიბრენცი
(მიკელ ნილსენი — ბავშვობაში)

Dark-ის სხვა მსახიობებისგან განსხვავებით, პატარა მიკელის შემსრულებელმა, დაან ლენარდ ლიბრენცმა, სერიალის შემდეგ აქტიური საერთაშორისო კარიერა არ აირჩია. მიუხედავად იმისა, რომ მან მონაწილეობა მიიღო რამდენიმე გერმანულ სატელევიზიო პროექტში, Dark დღემდე მის ყველაზე ცნობილ და ფართო აუდიტორიაზე გასულ როლად რჩება, ხოლო ბოლო წლებში ის საჯარო სივრცეში იშვიათად ჩნდება

მაია შიონე
(ჰანა კანვალდი)

Dark-ის შემდეგ მსახიობი საერთაშორისო სტრიმინგ-პროექტებში არ გადასულა, თუმცა აქტიურად აგრძელებს მუშაობას გერმანულ კინოსა და ტელევიზიაში. სერიალის პარალელურად და მის შემდეგ ის გამოჩნდა Tatort-ის ეპიზოდში, ასევე ფილმებში A Dark in the Light, Eine fremde Tochter და Der Mann der die Welt aß. მის კარიერაში Dark არ ყოფილა გარდამტეხი როლი.

იორდის ტრიბელი
(კატარინა ნილსენი)

იორდის ტრიბელის Dark-ის შემდგომი კარიერის ყველაზე თვალსაჩინო ნაწილი ტელევიზიას უკავშირდება. იგი მონაწილეობს გერმანული ტელევიზიის ერთ-ერთ ყველაზე მასშტაბურ და საერთაშორისო დონეზე აღიარებულ სერიალში Babylon Berlin, სადაც მნიშვნელოვან მეორეხარისხოვან როლში ჩნდება. პარალელურად, ტრიბელი ერთ-ერთი ცენტრალური ფიგურაა Deutschland 83 / Deutschland 86 / Deutschland 89-ის ტრილოგიაში, პროექტებში, რომლებმაც გერმანულ სერიალებს საერთაშორისო აუდიტორია გაუხსნა.

Dark ტრიბელის კარიერაში გარდამტეხი აღმოჩნდა არა ჟანრის შეცვლით, არამედ მასშტაბით, სერიალის შემდეგ ის დარჩა მძიმე, სოციალურად და პოლიტიკურად დატვირთული ტელედრამების ერთ-ერთ ყველაზე სანდო სახედ.

კაროლინა აიხჰორნი
(შარლოტა დოპლერი)

კაროლინა აიხჰორნი Dark-ამდეც ერთ-ერთი ყველაზე ცნობილი გერმანელი მსახიობი იყო. სერიალის შემდეგ ის აქტიურად მუშაობს გერმანიის საზოგადოებრივი მაუწყებლების დრამებსა და კრიმინალურ პროექტებში, რეგულარულად ჩნდება სატელევიზიო ფილმებსა და თეატრში. ის მონაწილეობს ახალ დრამატულ სერიალში Concordia – Tödliche Utopie (2024), არის პერსონაჟი ტელევიზიო ფილმში Morden im Norden: Weil du böse bist (2025) და გამოჩნდა Tatort-ის ეპიზოდშიც.

კლაუდია ტიდემანი — ორი თაობა

კლაუდია ტიდემანის ხანდაზმულ ვერსიას ასახიერებს ლიზა კროიცერი, გერმანული კინოს ლეგენდა, რომლისთვისაც Dark ახალი თაობისთვის მისი ხელახალი აღმოჩენის საფუძველი გახდა.

საშუალო ასაკის კლაუდიას კი იულიკა ჯენკინსი თამაშობს, გერმანული თეატრისა და ტელევიზიის ძლიერი ფიგურა.

ორივე მსახიობი ხშირად მონაწილეობს გერმანიის საზოგადოებრივი მაუწყებლების მაღალი ხარისხის დრამებსა და კრიმინალურ სერიალებში.

ანდრეას პიეტშმანი
(იონას კანვალდი — საშუალო ასაკი)

Dark-ის შემდეგ ანდრეას პიეტშმანი ძირითადად ტელევიზიაში დარჩა. Netflix-ის 1899-ში (2022) მან ერთ-ერთი მთავარი როლი, ეიკ ლარსენი, შეასრულა. სერიალი ერთ სეზონის მერე შეწყდა, თუმცა პიეტშმანი საერთაშორისო აუდიტორიამდე კვლავ მიიყვანა.

ამასთან ერთად, ის რეგულარულად ჩნდება გერმანულ კრიმინალურ დრამებში, Tatort, Die Chefin, სადაც მისი ჩაკეტილი და მკაცრი ამპლუა განსაკუთრებით მოთხოვნადია.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…