პოლიციის ინფორმაციით, საზერლენდმა ჰოლივუდში გამოძახებულ ტაქსიში ჩაჯდომის შემდეგ მძღოლზე ფიზიკურად იძალადა და მის მიმართ კრიმინალური მუქარაც გააჟღერა.

ლოს-ანჯელესის პოლიციის დეპარტამენტის (LAPD) ცნობით, ინციდენტი ორშაბათს, ადგილობრივი დროით 00:15-ზე მოხდა. პოლიცია ამბობს, რომ მსახიობმა "ავტომობილში ჩაჯდომის შემდეგ ფიზიკურად იძალადა მძღოლზე (დაზარალებულზე) და დაემუქრა".

პოლიციისვე განცხადებით, მძღოლს ინციდენტის შედეგად დაზიანება არ მიუღია.

59 წლის მსახიობი დაკავების შემდეგ 50 000 დოლარის გირაოს გადახდის საფუძველზე გაათავისუფლეს. ის სასამართლოში 2 თებერვალს უნდა გამოცხადდეს.

კიფერ საზერლენდი ცნობილია ისეთი როლებით, როგორიცაა სპეციალური აგენტი ჯეკ ბაუერი სერიალში 24 და აშშ-ის პრეზიდენტი სერიალში Designated Survivor. ის მსახიობ დონალდ საზერლენდის შვილია.

ბრიტანელ-კანადელი მსახიობი წარსულშიც არაერთხელ დაუკავებიათ. 2007 წელს მას 48-დღიანი პატიმრობა მიუსაჯეს ნასვამ მდგომარეობაში ავტომობილის მართვისა და პირობითი სასჯელის დარღვევის გამო.

2009 წელსაც მსახიობი თავდასხმის ბრალდებით დააკავეს, თუმცა მოგვიანებით საქმე შეწყდა. მისი ბოლო დაკავება 2020 წელს მოხდა, როდესაც ჰოლივუდში გზაზე უკანონო მობრუნება შეასრულა.