საქართველოს პარამენტში ქართული ოცნების დეპუტატი ირაკლი ხახუბია, რომელიც შვილის ავტოავარიაში დაღუპვაში პოლიციელებს ადანაშაულებს, ამბობს, რომ ბოლომდე იბრძოლებს:

"ადამიანის სიცოცხლე, ღირსება და სამართლიანობა ჩვენი საზოგადოებისთვის ყველაზე მნიშვნელოვანი ღირებულებაა. მართლმსაჯულება უნდა აღსრულდეს".

ირაკლი ხახუბიას განცხადებით, შვილის, ბექა ხახუბიას დაღუპვის მიზეზი დღეს უკვე ყოფილი პოლიციელების "გაუმართლებელი ქმედება" გახდა:

"გამოძიებამ დაადასტურა ის, რომ დასასვენებლად გაჩერებული სატვირთო ტრაილერის მძღოლს გიორგი ღლონტს, გორის საპატრულო პოლიციის თანამშრომლებმა არაგონივრული და უკანონო გადაწყვეტილებით აიძულეს სიბნელეში, გორის გვირაბის გასასვლელთან ჩაეხერგა გზა, ისე რომ მაღალი სიჩქარით მოძრავ ავტომობილს გაჩერების შანსი აღარ ჰქონდა".

17 მაისს, სავარაუდოდ, პოლიციის ეკიპაჟის დევნის დროს, ქართული ოცნების დეპუტატის, ირაკლი ხახუბიას შვილი, ბექა ხახუბია ავტოავარიაში დაიღუპა. ამ საქმესთან დაკავშირებით, შიდა ქართლის პოლიციის ორი ხელმძღვანელი გაათავისუფლეს.

თავდაპირველად საქმის გამოძიება შსს-მ დაიწყო, თუმცა მოგვიანებით პროკურატურამ გადაიბარა. ძიება 276-ე მუხლის მეხუთე ნაწილით მიმდინარეობს, რაც გულისხმობს ავტოტრანსპორტის უსაფრთხოების ან ექსპლუატაციის წესის დარღვევას, რამაც ადამიანის სიცოცხლის მოსპობა გამოიწვია.