ამერიკის შეერთებული შტატების პრეზიდენტი, დონალდ ტრამპი ვენესუელაში შემავალი და ვენესუელიდან გამომავალი ყველა სანქცირებული ნავთობის ტანკერის სრული და აბსოლუტური ბლოკადის ბრძანება გასცა. ამის შესახებ აშშ-ის პრეზიდენტმა Truth Social-ზე დაწერა.

ტრამპი ვენესუელას იმ ნავთობის, მიწის და სხვა აქტივების დაბრუნებას სთხოვს, რომელიც მისი თქმით, ვენესუელამ აშშ-ის მოჰპარა. ტრამპი ასევე წერს, რომ მადუროს რეჟიმი მოპარული ნავთობსაბადოებიდან მიღებულ ნავთობს ნარკოტერორიზმისთვის, ადამიანებით ვაჭრობისთვის, მკვლელობებისა და გატაცებებისთვის იყენებს. დონალდ ტრამპმა ასევე აღნიშნა, რომ "ამერიკა არ დაუშვებს, რომ კრიმინალებმა, ტერორისტებმა ან სხვა ქვეყნებმა გაძარცვონ, დაემუქრონ ან ზიანი მიაყენონ" ამერიკელებს.

"ვენესუელა სრულად გარშემორტყმულია ყველაზე დიდი არმადით, რომელიც სამხრეთ ამერიკის ისტორიაში ოდესმე შეკრებილა. ის მხოლოდ გაიზრდება და მათთვის ეს შოკი იქნება ისეთი, როგორიც აქამდე არასოდეს უნახავთ — მანამდე, სანამ ისინი მთელ ნავთობს, მიწას და სხვა აქტივებს, რომლებიც ადრე ჩვენგან მოიპარეს, ამერიკის შეერთებულ შტატებს არ დაუბრუნებენ. არალეგიტიმური მადუროს რეჟიმი ამ მოპარული ნავთობსაბადოებიდან მიღებულ ნავთობს საკუთარი თავის დასაფინანსებლად, ნარკოტერორიზმისთვის, ადამიანებით ვაჭრობისთვის, მკვლელობებისა და გატაცებებისთვის იყენებს. ჩვენი აქტივების ქურდობისთვის და მრავალი სხვა მიზეზის გამო, მათ შორის ტერორიზმის, ნარკოტიკების კონტრაბანდისა და ადამიანებით ვაჭრობის გამო, ვენესუელის რეჟიმი უცხო ტერორისტულ ორგანიზაციადაა გამოცხადებული. შესაბამისად,მე დღეს გავცემ ბრძანებას ვენესუელაში შემავალი და ვენესუელიდან გამავალი ყველა სანქცირებული ნავთობის ტანკერის სრული და აბსოლუტური ბლოკადის შესახებ. არალეგალი მიგრანტები და კრიმინალები, რომლებიც მადუროს რეჟიმმა სუსტი და უუნარო ბაიდენის ადმინისტრაციის პერიოდში შეერთებულ შტატებში გაგზავნა, სწრაფი ტემპით ბრუნდებიან ვენესუელაში. ამერიკა არ დაუშვებს, რომ კრიმინალებმა, ტერორისტებმა ან სხვა ქვეყნებმა გაძარცვონ, დაემუქრონ ან ზიანი მიაყენონ ჩვენს ერს და ასევე არ დაუშვებს, რომ მტრულმა რეჟიმმა ჩვენი ნავთობი, მიწა ან ნებისმიერი სხვა აქტივი წაიღოს— ყველაფერი ეს დაუყოვნებლივ უნდა დაუბრუნდეს ამერიკის შეერთებულ შტატებს. გმადლობთ ამ საკითხთან დაკავშირებით თქვენი ყურადღებისთვის!" — დაწერა ტრამპმა.