აშშ-ის პრეზიდენტმა, დონალდ ტრამპმა მუქარა შეასრულა და ბრიტანული მედიაკომპანია BBC-ის წინააღმდეგ 10 მილიარდი დოლარის (8.5 მილიარდი ევროს) ოდენობის სარჩელი 15 დეკემბერს შეიტანა.

თეთრმა სახლმა სარჩელის შესახებ ერთი თვის წინ განაცხადა. სასამართლო დავა მისი 2021 წლის 6 იანვრის სატელევიზიო გამოსვლის მონტაჟს მოჰყვა, რომელიც BBC-მ Panorama-ს პროგრამაში გამოიყენა. პროგრამა 2024 წლის ნოემბრის საპრეზიდენტო არჩევნებამდე ცოტა ხნით ადრე გავიდა ეთერში, რომელშიც ტრამპმა დემოკრატი კანდიდატი კამალა ჰარისი დაამარცხა.

აშშ-ის პრეზიდენტი მედიაკომპანიას "ცრუ, ცილისმწამებლურ, შეცდომაში შემყვან, დამამცირებელ, პროვოკაციის" შემცველი სურათის შექმნაში ადანაშაულებს. ტრამპი აცხადებს, რომ BBC-მ საპრეზიდენტო არჩევნებში ჩარევა და შედეგებზე მის საზიანოდ გავლენის მოხდენა სცადა.

კაპიტოლიუმის შტურმი

BBC-მ ტრამპის გამოსვლის სხვადასხვა ნაწილიდან ფრაგმენტები გამოიყენა და უწყვეტ ვიდეოდ დაამონტაჟა. იმ დღეს — 2021 წლის 6 იანვარს — ვაშინგტონში, კაპიტოლიუმის შენობაზე შტურმი მოხდა. იმავე დღეს 2020 წლის საპრეზიდენტო არჩევნების შედეგები უნდა გამოეცხადებინათ, რომელშიც ტრამპის ოპონენტმა, ჯო ბაიდენმა გაიმარჯვა.

ტრამპმა, რომელიც იმ დროს ფორმალურად ჯერ კიდევ უმაღლეს თანამდებობას იკავებდა, თავის გამოსვლაში გაიმეორა არჩევნების გაყალბების შესახებ ბრალდებები, რის შემდეგაც მისმა მხარდამჭერებმა კაპიტოლიუმის შენობა შტურმით აიღეს.

BBC უარყოფს ცილისწამების ბრალდებებს

BBC-მ ტრამპს ბოდიში მოუხადა და ეს ეპიზოდი BBC-ის გენერალური დირექტორის, ტიმ დეივის და ახალი ამბების ხელმძღვანელის, დებორა ტერნესის გადადგომის მთავარ მიზეზად დასახელდა.

სარჩელში ტრამპი ამტკიცებს, რომ მედიაკომპანიამ განზრახ ამოჭრა მისი გამოსვლის ძირითადი ნაწილი, რათა გადაცემა დამახინჯებულ კონტექსტში წარმოედგინა.

მანამდე, აშშ-ის პრეზიდენტის ადვოკატებმა BBC-ს წერილი გაუგზავნეს, სადაც წერდნენ, რომ სასამართლოში უჩივლებდნენ, თუ მედიაკომპანია ბოდიშს არ მოიხდიდა, გადაცემას არ შეწყვეტდა და კომპენსაციას არ გადაიხდიდა. BBC-მ განაცხადა, რომ ეპიზოდს ეთერში აღარ გაუშვებდა, მაგრამ კომპენსაციის გადახდაზე უარი, ცილისწამების საფუძვლის არარსებობის მოტივით, თქვა.