BBC-მ დონალდ ტრამპს 6 იანვარს Panorama-ს ეპიზოდში მისი გამოსვლის არასწორი მონტაჟისთვის ბოდიში მოუხადა, თუმცა კომპენსაციის მოთხოვნას არ დაეთანხმა. ამის შესახებ ინფორმაციას BBC ავრცელებს.

კორპორაციამ აღიარა, რომ მონტაჟმა "მცდარი შთაბეჭდილება შექმნა, თითქოს პრეზიდენტ ტრამპს ძალადობრივი ქმედებისკენ ჰქონოდა პირდაპირი მოწოდება" და განაცხადა, რომ 2024 წლის პროგრამას აღარ გაიმეორებს.

ტრამპის იურისტები BBC-ს მოთხოვნას უყენებენ: თუ კორპორაცია უარს იტყვის ფაქტის უარყოფაზე, ბოდიშსა და კომპენსაციაზე, უჩივლებენ და 1 მილიარდ დოლარს გადაახდევინებენ.

სკანდალის შემდეგ, კვირას, 9 ნოემბერს, BBC-ს გენერალური დირექტორი ტიმ დეივი და საინფორმაციო სამსახურის ხელმძღვანელი დებორა ტერნესი გადადგნენ.

BBC-ს ბოდიში მას შემდეგ გამოქვეყნდა, რაც Daily Telegraph-მა ტრამპის კიდევ ერთი, მსგავსად დამონტაჟებული ფრაგმენტი გამოავლინა, რომელიც 2022 წლის Newsnight-ში გავიდა.

BBC აღიარებს, რომ Panorama-ს ეპიზოდის გადამოწმება ტრამპის გამოსვლის მონტაჟზე კრიტიკის შემდეგ მოხდა.

"ვაღიარებთ, რომ მონტაჟმა უნებლიედ შექმნა შთაბეჭდილება, თითქოს ჩვენ ვაჩვენებდით ერთიან და უწყვეტ მონაკვეთს, მიუხედავად იმისა, რომ ეს იყო სხვადასხვა მომენტიდან ამოღებული ფრაგმენტები. ამან კი მცდარი შთაბეჭდილება დატოვა, თითქოს პრეზიდენტ ტრამპს ძალადობრივი ქმედების პირდაპირი მოწოდება ჰქონდა", — ნათქვამია BBC-ს განცხადებაში.