ჰარვი ვაინშტაინის გარშემო ატეხილ სკანდალს ცოტა ხნის წინ მისი ძმა, ბობ ვაინშტაინიც გამოეხმაურა, რომელმაც ჰარვის ავადმყოფი და მსოფლიო დონის მატყუარა უწოდა. ამის შესახებ ინფორმაციას TMZ ავრცელებს.

"ჩემი ძმა ჰარვი აშკარაა, რომ ავადაა, ბევრჯერ ვუთხარი რომ მას დახმარება სჭირდება და ვურჩიე პროფესიონალებისთვის მიემართა. ის მძიმე მდომარეობაშია. მისი ბოდიში, რომელიც მან მსხვერპლ ქალებს მოუხადა, სიხარიელეა, ის ასე არ ფიქრობს. მან იცის და თქვა, რომ დახმარება სჭირდება, თუმცა როგორც სჩანს ჯერ ამისთვის ვერ მოიცალა. ჰარვი მსოფლიო დონის მატყუარაა, მან თავად დაამტკიცა ეს.", - უთხრა გამოცემას ჰარვის ძმამ, ბობ ვაინშტაინმა.

ჰარვი ვაინშტაინი ათწლეულების განმავლობაში ჰოლივუდის გავლენიანი პროდიუსერი იყო, თუმცა მისი კარიერა იმ ქალებმა დაასრულეს, რომლებზეც ის წლების განმავლობაში ძალადობდა.

ვაინშტაინი პირველად მსახიობმა ეშლი ჯადმა, ნიუ-იორკ თაიმსისსაშუალებით ამხილა. მისი წერილის მიხედვით, ვაინშტაინმა, 90-იან წლებში, ის სასტუმროს ნომერში კონტრაქტის პირობებზე სასაუბროდ დაიბარა, შემდეგ კი დიალოგი სააბაზანოში შესთავაზა და მასთან ერთად შხაპის მიღება მოსთხოვა.

ეშლი ჯადის გარდა, ჰარვის სექსუალური შევიწროვების ბრალდებით უამრავი ქალი ადანაშაულებს, მათ შორის მისი ყოფილი ასისტენტები და ჰოლივუდის ისეთი გავლენიანი მსახიობები, როგორებიც არიან ანჯელინა ჯოლი და გვინეტ პელტროუ.

გუშინ სამმა ქალმა ჰარვი ვაინშტაინი გაუპატიურებაში დაადანაშაულა. მათგან ერთ-ერთი იტალიელი მსახიობია, რომლის თქმითაც, ვაინშტაინს მასთან ძალადობით ჰქონდა ორალური და ვაგინალური სექსი. ოთხი ქალი ამბობს, რომ ვაინშტაინი მათ მათი ნების საწინააღმდეგოდ შეეხო. ქალების ნაწილის თქმით, ვაინშტაინი მათ წინაშე მასტურბირებდა.

გუშინ ნიუ-იორკერმა პირველად გამოაქვეყნა 2015 წლის ჩანაწერი, რომელშიც ვაინშტაინი იტალიელ მოდელს, ამბრა გუტიერესს, აბაზანაში შეყოლას დაჟინებით სთხოვს. მოდელი უარობს, რადგან მისთვის წინა მსგავსი შემთხვევა უსიამოვნოდ დასრულდა, თუმცა ვაინშტაინი მას ეუბნება, რომ 5 წუთის გამო "მეგობრობას" ნუ დაანგრევს.

ჩანაწერის გავრცელებიდან რამდენიმე საათში ჰარვი ვაინშტაინის ცოლმა, ჯორჯიანა ჩეპმენმა, განქორწინებაზე შეიტანა საბუთები.

გაიგე მეტი: სექსუალური შევიწროება კინოინდუსტრიაში - ჰოლივუდი ჰარვი ვაინშტაინის წინააღმდეგ.