HBO Max საქართველოში გაყიდულ ბავშვებზე დოკუმენტურ ფილმს უშვებს. ფილმს მოპარული ბავშვები ჰქვია და საქართველოში ახალშობილებით უკანონო ვაჭრობას ეხება.

დოკუმენტური ნამუშევარი ქართველი ჟურნალისტის, თამუნა მუსერიძის საგამოძიებო საქმიანობას ეფუძნება. თამუნამ, მას შემდეგ, რაც აღმოაჩინა, რომ უამრავ დედას საკუთარი შვილი გაუყიდეს, შექმნა პლატფორმა "ვეძებ", რომლის საშუალებითაც ოჯახებს ერთმანეთის პოვნაში ეხმარება.

თამუნა მუსერიძე ფილმის პრემიერაზე

ფილმში მოთხრობილია, როგორ იყიდებოდნენ სამშობიაროებიდან ჩვილი ბავშვები. ეს პროცესი, როგორც ცნობილია, საბჭოთა საქართველოში დაიწყო, თუმცა იქ არ გაჩერებულა და დახლოებით 2005 წლამდე გრძელდებოდა. ფილმის ტრეილერში აღნიშნულია, რომ ამ პერიოდში ქვეყანაში 100 ათასზე მეტი ახალშობილის გაყიდვის ფაქტი დაფიქსირდა.

თამუნა მუსერიძის გამოძიება ისეთ შემთხვევებს ეხება, როდესაც დედებს მშობიარობის შემდეგ ატყუებდნენ, რომ მათი შვილი გარდაიცვალა. არსებული ინფორმაციით, თუ ოჯახი ბავშვის გასვენების მიზნით მის ცხედარს მოითხოვდა, მათთვის სხვა გაყინული ბავშვების სხეულები მიჰქონდათ, რომლებიც სათადარიგო შემთხვევებისთვის ჰქონდათ გადანახული.

დოკუმენტური ფილმი ასევე მოგვითხრობს დაბადებისას დაშორებული ტყუპი დების — თათული ხვიტიასა და ანო სართანიას ისტორიას, რომლებიც 19 წლის შემდეგ სოციალური მედიის საშუალებით შეხვდნენ ერთმანეთს.

ფოტო: HBO Max

ფილმის სცენარის ავტორი და რეჟისორი პოლონელი მარტინა ვოიცეხოვსკა და იოვიტა ბარანიეცკა არიან. მისი ნახვა 12 დეკემბრიდან HBO Max-ზე შეგიძლიათ.

იხილეთ ტრეილერი: