გუშინ ნიუ-იორკერმა პირველად გამოაქვეყნა 2015 წლის ჩანაწერი, რომელშიც ვაინშტაინი იტალიელ მოდელს, ამბრა გუტიერესს, აბაზანაში შეყოლას დაჟინებით სთხოვს. მოდელი უარობს, რადგან მისთვის წინა მსგავსი შემთხვევა უსიამოვნოდ დასრულდა, თუმცა ვაინშტაინი მას ეუბნება, რომ 5 წუთის გამო "მეგობრობას" ნუ დაანგრევს.

ჩანაწერის გავრცელებიდან რამდენიმე საათში ჰარვი ვაინშტაინის ცოლმა, ჯორჯიანა ჩეპმენმა, განქორწინებაზე შეიტანა საბუთები.

ჰარვი და ჯორჯიანა ერთმანეთს პირველად 2004 წლის დეკემბერში შეხვდნენ, 2007 წელს კი ოფიციალურად დაქორწინდნენ.

ჯორჯიანა ინგლისელი დიზაინერია, რომელიც საკუთარ მოდის სახლს Marchesa-ს ფლობს.

შეგახსენებთ, რომ სექსუალურ შევიწროებაში ჰარვი ვაინშტაინი პირველად მსახიობმა ეშლი ჯადმა, ნიუ-იორკ თაიმსის საშუალებით ამხილა. მისი წერილის მიხედვით, ვაინშტაინმა, 90-იან წლებში, ის სასტუმროს ნომერში კონტრაქტის პირობებზე სასაუბროდ დაიბარა, შემდეგ კი დიალოგი სააბაზანოში შესთავაზა და მასთან ერთად შხაპის მიღება მოსთხოვა.

ამავდროულად გუშინ სამმა ქალმა ჰარვი ვაინშტაინი გაუპატიურებაში დაადანაშაულა. მათგან ერთ-ერთი იტალიელი მსახიობია, რომლის თქმითაც, ვაინშტაინს მასთან ძალადობით ჰქონდა ორალური და ვაგინალური სექსი. ოთხი ქალი ამბობს, რომ ვაინშტაინი მათ მათი ნების საწინააღმდეგოდ შეეხო. ქალების ნაწილის თქმით, ვაინშტაინი მათ წინაშე მასტურბირებდა.

ეშლი ჯადის გარდა, ჰარვის სექსუალური შევიწროების ბრალდებით უამრავი ქალი ადანაშაულებს, მათ შორის მისი ყოფილი ასისტენტები და ჰოლივუდის ისეთი გავლენიანი მსახიობები, როგორებიც არიან ანჯელინა ჯოლი და გვინეტ პელტროუ.

გაიგეთ მეტი: სექსუალური შევიწროება კინოინდუსტრიაში - ჰოლივუდი ჰარვი ვაინშტაინის წინააღმდეგ.