ბაზისბანკისა და საქართველოს ეროვნული ბანკის ფინანსური განათლების პლატფორმა ფინედუს კონკურსი გახდი ფინედუს დესპანი მასწავლებელი დასრულდა. გამოვლენილია 30 გამარჯვებული მასწავლებელი.

კონკურსი ფინედუს ორგანიზებითა და ბაზისბანკის მხარდაჭერით მიმდინარეობდა და ითვალისწინებდა მასწავლებლების მიერ ფინედუს მიწოდებული მასალებითა და ინსტრუქციით მინიმუმ ერთი გაკვეთილის ჩატარებას. კონკურსის გამარჯვებულებად ჩაითვლებოდა პირველი 30 მასწავლებელი, რომლებიც ჩაატარებდნენ სპეციალურ გაკვეთილს და კონკურსის პირობების დაცვით საჯაროდ გაავრცელებდა პროექტისა და გაკვეთილის შესახებ ინფორმაციას.

კონკურსი 31 ოქტომბერს, დაზოგვის მსოფლიო დღეს დაანონსდა და ნოემბრის ბოლომდე მიმდინარეობდა. პროექტში 150-მდე მასწავლებელი ჩაერთო ფინედუს დესპანის მისიით და V-XII კლასის მოსწავლეებთან ინტერაქციული გაკვეთილი პირადი ფინანსებისა და ფულის დაზოგვის თემაზე ჩაატარა.

1-ელ დეკემბერს გამოვლინდა 30 გამარჯვებული მასწავლებელი. ყველა მათგანს სულაკაურის გამომცემლობის 50 ლარიანი და გამომცემლობა ინტელექტის 50 ლარიანი ვაუჩერები გადაეცემა, კონკურსის ყველა მონაწილეს კი — ფინედუს დესპანი მასწავლებლის სერტიფიკატი.

“ბაზისბანკი ეროვნული ბანკის საგანმანათლებლო პლატფორმა ფინედუს პროექტების აქტიური მხარდამჭერია. წელსაც თანამშრომლობის ფარგლებში არაერთი მნიშვნელოვანი პროექტი განხორციელდა, მათგან ერთ-ერთი იყო კონკურსი გახდი „ფინედუს დესპანი მასწავლებელი“, რომელმაც წარმატებულად ჩაიარა. ბაზისბანკის მხარდაჭერით მომავალშიც საინტერესო საგანმანათლებლო პროექტების განხორციელება იგეგმება, რომლებიც მოზარდებში ფინანსური განათლების ხელშეწყობისკენ იქნება მიმართული.’’ — განაცხადა ბაზისბანკის სტრატეგიული კომუნიკაციების და ბრენდინგის დეპარტამენტის უფროსმა, თამარ ხადურმა.