გაფრთხილება: სტატია შეიცავს სპოილერებს!

2025 წლის 26 ნოემბერს ყველასთვის საყვარელი და ერთ-ერთი უდიდესი სერიალ Stranger Things-ის ბოლო, მე-5 სეზონის პირველი 4 ეპიზოდი გამოვიდა და თავისუფლად შეგვიძლია ვთქვათ, რომ ლოდინად ღირდა.

სეზონს, როგორც სერიალის შემქმნელებმა — ძმებმა დაფერებმა აღნიშნეს, წინა სეზონებისგან განსხვავებით, პირდაპირ ქაოსში ვიწყებთ. ყოველი შემდეგი წუთის გასვლისას და ახალი ეპიზოდის ჩართვისას იგრძნობა, რომ დაძაბულობა უფრო და უფრო მატულობს და სერიალის კულმინაცია ახლოვდება, თუმცა მანამდე კიდევ 1 თვე დარჩა. მე-5 სეზონის შემდეგი 3 ეპიზოდი 25 დეკემბერს, შობის ღამეს გამოდის, ხოლო ბოლო, ფინალური ეპიზოდი 31 დეკემბერს — ახალი წლის ღამეს.

როგორც ძმებმა დაფერებმა, ისე თავად მსახიობებმა სეზონთან დაკავშირებით თავისი მოსაზრებები გაგვიზიარეს და გვითხრეს, თუ რას უნდა ველოდოთ Stranger Things-ის ბოლო 4 ეპიზოდში.

1. უილი და Upside Down

მეორე ნაწილში საბოლოოდ გავიგებთ პასუხს კითხვაზე:

რატომ გაიტაცეს მაინცდამაინც უილი 1983 წლის 6 ნოემბერს?

დაფერების თქმით, სეზონის ბოლოს ისტორია წრეს კრავს და ყველაფერი ნათელი ხდება.

რაც მთავარია, აიხსნება რა არის სინამდვილეში Upside Down და მის უკან მდგარი საიდუმლოება. როს დაფერის თქმით, ეს ის მომენტია, რომელსაც 10 წლის განმავლობაში გეგმავდნენ.

მე-5 სეზონის პირველი ნაწილის ერთ-ერთი ყველაზე გამორჩეული მომენტი იმის აღმოჩენაა, რომ უილს, ილევენის მსგავსად, ძალები გააჩნია. ის მე-4 ეპიზოდის ბოლოს სწორედ თავისი ძალების გამოყენებით გადაარჩენს მეგობრების — მაიკის, ლუკასისა და რობინის სიცოცხლეს.

თუმცა, ნოა შნაპის თქმით, უილის ახალაღმოჩენილი ძალები ილევენის შესაძლებლობებს არ ჰგავს. ამ ძალების ვეკნასთან კავშირი მსახიობს უფრო ჰარი პოტერისა და ვოლდემორის ურთიერთობას აგონებს, რის გამოც სერიალის გადაღებების დროს ნოამ ჰარი პოტერის ფილმებს ხელახლა უყურა.

2. მაქსი და ჰოლი

მეხუთე სეზონის დასაწყისშივე ვიგებთ, რომ მაქსი ვეკნას თავდასხმიდან 18 თვის შემდეგ ჯერ კიდევ კომაშია. ამ სეზონში მნიშვნელოვან როლს ირგებს პერსონაჟი, რომელიც მანამდე ჩვენს ეკრანებზე ნაკლებად ჩანდა და ისტორიისთვის მეორეხარისხოვან როლს თამაშობდა — ჰოლი, მაიკისა და ნენსის უმცროსი და.

ჰოლი ვეკნას გეგმის ერთ-ერთი ობიექტი აღმოჩნდება და თავს ჰენრის გონებაში ამოყოფს, რომელსაც "კამაზოცს" უწოდებენ. სწორედ აქ შეხვდებიან ერთმანეთს მაქსი და ჰოლი და აღმოვაჩენთ, რომ ორივე მათგანი ვეკნას მოგონებებშია გამოკეტილი, მაგრამ დანებებას არ აპირებენ — ისინი თავის დაღწევის გეგმას სახავენ.

ვეკნას მსახიობის, ჯეიმი კემპბელ ბაუერის თქმით, მაქსი ვეკნასთვის დიდი პრობლემა გახდება და შიგნიდან უშლის ხელს. მეექვსე ეპიზოდის სათაური "გაქცევა კამაზოციდან" მიანიშნებს, რომ სწორედ აქ ვიხილავთ გოგონების მცდელობას, თავი დააღწიონ ვეკნას ტყვეობას.

3. ილევენი და 008

პარალელურად, ილევენს ახალი საფრთხე ემუქრება. დოქტორი ქეი, ბრენერისგან განსხვავებით, არ არის დაინტერესებული ილევენის გამოკვლევით და დახმარებით — ის გოგონას მხოლოდ იარაღად აღიქვამს.

თუმცა, ილევენი მარტო არ არის — მე-4 სერიის ბოლოს ეკრანზე კალი, იგივე ნომერი 8 ჩნდება, რომელიც, როგორც სერიალის შემქმნელები ამბობენ, გადამწყვეტ როლს ითამაშებს ილევენის ისტორიის დასასრულში. სეზონის მეორე ნაწილში გავიგებთ, თუ რატომ იყო კალი მიერთებული აპარატზე და როგორ უკავშირდება ეს ილევენის ძალების დაბლოკვას.

რაც უფრო ვუახლოვდებით სერიალის დასასრულს, მით უფრო სავსეა სცენარი არა მხოლოდ დაძაბულობით, არამედ ემოციური სცენებითა და მონოლოგებით. მათ შორის, სეზონის ერთ-ერთი მთავარი იდეა რობინის ფრაზითაა გადმოცემული, რომელიც უილისთვის შთაგონებად იქცევა:

რაც შეეხება ფინალურ ეპიზოდს, რამდენიმე მსახიობმა, მათ შორის სეიდი სინკმა და ნოა შნაპმა განაცხადა, რომ თავიანთი პერსონაჟების დასასრულით კმაყოფილები და ბედნიერები არიან.

Stranger Things-ის რეჟისორი შონ ლევი ამბობს, რომ ფინალური ეპიზოდი არის ერთ-ერთი საუკეთესო ფინალი სერიალების ისტორიაში და ის კინოთეატრების დიდ ეკრანებს იმსახურებს. შემქმნელები გვპირდებიან, რომ ფინალი იქნება ყველაზე მასშტაბური, რაც კი აქამდე გვინახავს.

იხილეთ Stranger Things-ის მე-5 სეზონის შექმნის კადრები: