კომუნიკაციების კომისიამ (ComCom) ეთერში პროდუქტის განთავსების წესების დარღვევისთვის "ფორმულა" 7500 ლარით, ხოლო PP-ისა და სპონსორობის წესების დარღვევისთვის "ტვ პირველი" — 2500 ლარით დააჯარიმა. ამის შესახებ ინფორმაციას ComCom თავად ავრცელებს.

"მათ მიერ განხორციელებული მედიამონიტორინგის შედეგად გამოვლინდა, რომ 5 და 19 ოქტომბერს, "ტვ პირველის" გადაცემაში "ოჯახის ექიმი", ხოლო 11, 12, 18 და 19 ოქტომბერს "ფორმულას" გადაცემაში "ყოველდღე" გამოვლინდა სარეკლამო კომუნიკაციის წესების დარღვევები, მათ შორის, პროდუქტებს მიენიჭათ გადაჭარბებული მნიშვნელობა და პროდუქტის განთავსებამ გადაცემის შინაარსზე გავლენა მოახდინა. ამასთან, გაჟღერდა ინფორმაცია პროდუქტის ხელმისაწვდომობის შესახებ. დამატებით, "ფორმულას" პროგრამაში გაკეთდა პროდუქტის შეძენისკენ მოწოდებები.

ამას გარდა, "ტვ პირველის" შემთხვევაში, დარღვეულია სპონსორზე მითითების წესებიც, რადგან სპონსორზე მითითება შეიცავდა, მათ შორის, სარეკლამო შეტყობინებას, რაც "მაუწყებლობის შესახებ" საქართველოს კანონისა და კომისიის 2016 წლის 14 იანვრის №1 დადგენილებით დამტკიცებული "სპონსორზე მითითების სახელმძღვანელო რეკომენდაციების" მოთხოვნებს ეწინააღმდეგება.

სარეკლამო კომუნიკაციის დარღვევით განთავსება მაყურებლის ინტერესების უხეში დარღვევაა, ვინაიდან აღნიშნულმა, შესაძლოა, მათ გადაწყვეტილებებზე გავლენა მოახდინოს. აქედან გამომდინარე, მნიშვნელოვანია, რომ მაუწყებელმა დაიცვას საქართველოს კანონით განსაზღვრული წესები, რათა არ დაარღვიოს მაყურებლის უფლებები და არ მოახდინოს პროგრამის შინაარსზე გავლენა, რაც, თავის მხრივ, მედია პროდუქტის ხარისხს აუარესებს.

გამომდინარე იქიდან, რომ „ტვ პირველს“ ანალოგიური დარღვევისთვის მიმდინარე წელს წერილობითი გაფრთხილება მიღებული ჰქონდა, ComCom-მა მაუწყებელი 2500 ლარით დააჯარიმა. „ფორმულას“ კი წერილობით გაფრთხილებასთან ერთად, ანალოგიური დარღვევისთვის 2500 ლარიანი ჯარიმა უკვე მიღებული ჰქონდა, შესაბამისად, კანონდარღვევისთვის ComCom-მა მაუწყებელი 7500 ლარით დააჯარიმა", — წერია ComCom-ის მიერ გავრცელებულ ინფორმაციაში.