მოძრაობა "ბალდის კანიონის შესანარჩუნებლად" ცნობით, ბალდის მცხოვრებლები კანიონის ტერიტორიაზე ინვესტორი კომპანიის დაცვას არ უშვებდნენ. მათი განცხადებით, 29 ნოემბერს, ორ დღეში, საიჯარო ხელშეკრულების 3-წლიანი ვადა იწურება. მოძრაობა უკვე ორ წელზე მეტია ტერიტორიის კერძო მეიჯარეებზე გასხვისებას აპროტესტებს და მათი მოთხოვნაა — "მალულად გაცემული იჯარის ხელშეკრულება" არ გახანგრძლივდეს.

"კომპანიის თანამშრომლები ცდილობენ, რომ ტერიტორიაზე შეიყვანონ დაცვა. 2 დღეა დარჩენილი კომპანიის საიჯარო ხელშეკრულების ვადის გასვლამდე. გვინდა, მივიღოთ ზუსტი და ნორმალური პასუხი. ჩვენი მოთხოვნაა, კომპანიას არ გაუხანგრძლივდეს ხელშეკრულება.
აქ ვდგავართ ქალები, გვინდა, რომ დავიცვათ ჩვენი შვილები, რომ არ იყოს მეტი დაძაბულობა, რაც აქამდე ხდებოდა. კანიონი გვეკუთვნის ჩვენ, ჩვენი და უნდა იყოს ჩვენი. არ გვინდა იჯარა და გასხვისება.

არ შედის და ვცდილობთ, რომ არ შევუშვათ კანიონის დაცვა, სხვა ყველას შეუძლია, გაიარ-გამოიაროს," — თქვა ბალდელმა ქალმა. (ტექსტი "პუბლიკა")

მოგვიანებით, მოძრაობამ სოციალურ ქსელში განათავსა ვიდეო, რომელშიც მათი განცხადებით პოლიციამ "კომპანიის დაცვის თანამშრომელი მიტაცებულ კანიონში პიკაპით შეაპარა".

"პოლიცია მოძალადე კომპანიის სამსახურში!

ბალდელმა დედებმა კომპანიის დაცვის თანამშრომელი მიტაცებულ კანიონში არ შეუშვეს. პოლიციის ეკიპაჟმა ის დედებისგან მალულად, შემოვლითი გზით, პოლიციის პიკაპით შეაპარა", — წერენ სოციალურ ქსელში და ვიდეოს აქვეყნებენ.

შეგახსენებთ, 2022 წელს ბალდის კანიონში ტურისტული ინფრასტრუქტურის განვითარებისთვის შპს "კანიონი 350-მა" აუქციონზე 24 130 კვადრატული მეტრი მიწის ნაკვეთი 40 წლის იჯარით მიიღო. ხელშეკრულების მიხედვით, კომპანიას სამი წლის განმავლობაში უნდა შეესრულებინა ინფრასტრუქტურული სამუშაოები და არანაკლებ 2.8 მილიონი ლარის ინვესტიცია ჩაედო.

მოსახლეობის თქმით, სააგენტომ სამართლებრივი მოთხოვნები დაარღვია, რადგან კანიონის იჯარით გაცემის გადაწყვეტილება ადგილობრივების ინფორმირების და მათთან შეთანხმების გარეშე მიიღო.