ოცნების პარლამენტის თავმჯდომარე, შალვა პაპუაშვილი გაფართოების საკითხებში ევროკომისარ მარტა კოსის განცხადებას გამოეხმაურა იმის შესახებ, რომ "ეძებენ გზებს, თუ როგორ გადასცენ ფული საქართველოში სამოქალაქო საზოგადოებას".

პაპუაშვილის თქმით, "ქალბატონმა კოსმა და მისმა ელჩმა ჰერჩინსკიმ უნდა მიმართოს საქართველოს მთავრობას და თუ ეს იქნება ქართველი ხალხისთვის სასარგებლო პროექტი, მთავრობა რა თქმა უნდა თანხმობას მისცემს"

"უნდათ [ევროკავშირს] კვლავ რადიკალებში დახარჯონ ფული და თან ისე, რომ იმის პატივიც არ დაგვდონ, რომ ეს ყველაფერი ფარულად აფინანსონ და ქალბატონმა კოსმა რაც განაცხადა, რამე ღირებულებაში ჯდება?! თქვა, რომ ჩვენ ვეძებთ გზებს როგორ ავუაროთ გვერდი კანონებსო. ქალბატონმა კოსმა და მისმა ელჩმა ჰერჩინსკიმ მიმართოს საქართველოს მთავრობას, თუ ვინმეს დაფინანსება უნდათ და თუ ეს იქნება ქართველი ხალხისთვის სასარგებლო პროექტი, მთავრობა რა თქმა უნდა თანხმობას მისცემს. ქართველი ხალხის მიერ არჩეული მთავრობა ცდილობს მხოლოდ ერთ რამეს — საქართველოში უცხოური ფული დაიხარჯოს ქართველი ხალხის ინტერესების სასარგებლოდ და არა საწინააღმდეგოდ. ვინც საწინააღმდეგოდ აპირებს ფულის დახარჯვას, ისინი არიან, ვინც ცდილობს [კანონის] გვერდის ავლას.

ევროკავშირს აქვს დაწესებული რუსეთისთვის შეზღუდვები. ჩვენ არ ვართ ევროკავშირის წევრები და არანაირი ვალდებულება არ გვაქვს, მაგრამ ვთქვით, რომ უზრუნველვყოფთ, რომ ევროკავშირის მიერ დაწესებულ შეზღუდვებს გვერდი არავინ აუაროს საქართველოში. ამაზე ერთი ამბავი ხომ ატეხეს, 15 რევიზია ხომ ჩამოგვდის და ვერცერთი ფაქტი ნახეს, რომ საქართველომ გვერდის ავლის შესაძლებლობა მისცა ევროკავშირის მიერ დაწესებულ შეზღუდვებს. ახლა რას გვეუბნება უმაღლესი თანამდებობის პირი, ქალბატონი კოსი, რომ ის აპირებს ქართულ შეზღუდვებს - რომ პირდაპირ არ უნდა დააფინანსო და უნდა მიიღო მთავრობის თანხმობა, ახლა ეძებს გზებს, როგორ აუაროს გვერდი ქართულ რეგულაციებს. ევროკავშირის რეგულაციებს ჩვენ უნდა დავემორჩილოთ და ნაცვლად იმისა, რომ მადლობა გადაგვიხადონ, ჩვენ რეგულაციებს ისინი არ უნდა დაემორჩილონ?!", — თქვა პაპუაშვილმა სამთავრობო ტელეკომპანაი "იმედის" ეთერში.

შეგახსენებთ, რომ 18 ნომემებრს გაფართოების ფორუმის პანელურ დისკუსიაზე საქართველოს შესახებ დასმული შეკითხვის პასუხად გაფართოების საკითხებში ევროკომისარმა მარტა კოსმა განაცხადა, რომ საქართველოში სამოქალაქო საზოგადოების მხარდაჭერა რთულია, რადგან მთავრობა ძალიან ყურადღებით აკვირდება, თუ ვის მივცემთ ფულს.

"საქართველოში სამოქალაქო საზოგადოების მხარდაჭერას რაც შეეხება, მიუხედავად იმისა, რომ ახლა ეს რთულია, რადგან მთავრობა ძალიან ყურადღებით აკვირდება, თუ ვის მივცემთ ფულს, ფინანსური დახმარება გაორმაგდა და იქნება კიდევ უფრო მეტი. ჩვენ ახლა ვეძებთ გზებს, თუ როგორ გადავცეთ მათ ფული ისე, რომ არ დავაზარალოთ ისინი. მაგალითად, გასულ კვირას მქონდა დიალოგი კანდიდატი ქვეყნების სამოქალაქო საზოგადოების წარმომადგენლებთან, სადაც საქართველოს წარმომადგენელიც იმყოფებოდა", – განაცხადა კოსმა

ბრიუსელში გაფართოების ფორუმი გაიხსნა, სადაც საქართველო მიწვეული არ არის