ევროპის ფონდის კვლევის თანახმად, რომელიც CRRC-მა შეასრულა, მოსახლეობის 41 პროცენტი მიიჩნევს, რომ ევროკავშირი საფრთხეს უქმნის ქართულ ტრადიციებს, მაგრამ მოსახლეობის 49 პროცენტი ამ მოსაზრებას არ ეთანხმება. კვლევის ავტორები აღნიშნავენ, რომ 2015 წელს თანაფარდობა იყო 45 პროცენტი და 34 პროცენტი, ანუ ბოლო ორი წლის განმავლობაში ევროკავშირის ქართული ტრადიციების საფრთხის აღქმა 15 პროცენტით შემცირდა.

კვლევის ანგარიშის მიხედვით, საქართველოს მოსახლეობისათვის ევროკავშირი, უპირველეს ყოვლისა, საერთაშორისო ორგანიზაციასა და პოლიტიკურ გაერთიანებას წარმოადგენს. შემდეგ უკვე მოდის ეკონომიკური გაერთიანების ხედვა. კვლევის მიხედვით, ეთნიკური უმცირესობების წარმომადგენლებს ჯერ კიდევ უჭირთ ამ კითხვაზე პასუხის გაცემა.

ანგარიშში ასევე აღნიშნულია, რომ მოსახლეობის 10 პროცენტის წარმოდგენა ევროკავშირის მიმართ უარყოფითია. მეტია მათი წილი, ვინც აცხადებს, რომ მათი წარმოდგენა ევროკავშირის შესახებ დადებითია - 45 პროცენტი. კვლევის მიხედვით, მოსახლეობის 40 პროცენტის წარმოდგენა ევროკავშირის მიმართ ნეიტრალურია.

კვლევის ავტორები ამბობენ, რომ, როგორც წინა წლებში, 2017 წელსაც მათ შეისწავლეს მოსახლეობის მოსაზრებები იმასთან დაკავშირებით, თუ რას წარმოადგენს ევროკავშირი.

ანგარიშის მიხედვით, წინა წლების ანალოგიურად, საქართველოს მოსახლეობის უმრავლესობისთვის ევროკავშირი მშვიდობასთან, უსაფრთხოებასა და დემოკრატიასთან ასოცირდება. მოსახლეობა ეთანხმება იმ აზრს, რომ:

  • ევროკავშირი ევროპაში მშვიდობისა და უსაფრთხოების წყაროა - 74 პროცენტი;
  • დემოკრატიული გაერთიანება - 73 პროცენტი;
  • ის ხელს უწყობს დემოკრატიის განვითარებას მის ფარგლებს გარეთ არსებულ ქვეყნებში - 69% პროცენტი;
  • ის ხელს უწყობს მის ფარგლებს გარეთ მყოფი ქვეყნების ეკონომიკურ განვითარებას - 66 პროცენტი.

CRRC-ის მიერ ჩატარებული გამოკითხვის საფუძველზე მომზადებულ ანგარიშში შეფასებულია ევროკავშირის მიმართ საზოგადოების ცოდნა და დამოკიდებულება. 2009, 2011, 2013, 2015 და 2017 წლების კვლევების შედეგების შედარების საფუძველზე, ანგარიშში ასევე შეფასებულია, თუ როგორ იცვლებოდა მოსახლეობის შეფასებები, მოლოდინები და იმედები ევროპასთან ინტეგრაციის კუთხით. 2017 წელს გამოიკითხა 2 258 რესპონდენტი ოთხ სტრატაში.