ოცნების დეპუტატი ვლადიმერ ბოჟაძე ყოფილი პრემიერის მიმართ 20-21 ივნისის საქმეზე ბრალის წარდგენას ეხმაურება. მისი თქმით, მან "ქვეყანა დამხობას გადაარჩინა ნამდვილად, მაგრამ გადაარჩინა ადამიანის უფლებათა დარღვევის ხარჯზე".

"ქვეყანა დამხობას გადაარჩინა ნამდვილად, მაგრამ გადაარჩინა ადამიანის უფლებათა დარღვევის ხარჯზე. ყველა ადამიანი, ვინც დაზარალდა და მიიღო მძიმე დაზიანება სახელმწიფომ ცნო დაზარალებულად. ვიდრე სტრასბურგმა არ დაავალა ხელახლა გამოძიება სხვა კუთხით, მანამდე მაშინდელმა გამოძიებამ დანაშაული ვერ დაადგინა. გამოძიება დასრულებული არ არის, კიდევ გრძელდება. შეიძლება სხვა ადამიანების ბრალეულობაც გამოიკვეთოს.

[...] ქვეყანაში არის კანონის უზენაესობა რაც გულისხმობს შემდეგს — არვის ჩადენილი სავარაუდო დანაშაული არ შერჩება", — თქვა ვლადიმერ ბოჟაძემ "ტვ პირველის" ჟურნალისტთან საუბრისას.

შეგახსენებთ, რომ გუშინ, პროკურატურამ გიორგი გახარიას მიმართ 20-21 ივნისის საქმეზე და ჩორჩანას ეპიზოდზე სისხლის სამართლის დევნა დაიწყო — უწყება ყოფილი პრემიერმინისტრისთვის აღმკვეთი ღონისძიების სახით პატიმრობას ითხოვს. გენერალურმა პროკურორმა, გიორგი გვარაკიძემ ბრიფინგზე განაცხადა, რომ გახარიასთვის წაყენებული ბრალდებები 13 წლამდე პატიმრობას ითვალისწინებს.