ევროკავშირი ამერიკული კომპანია Amazon-ისგან 250 მილიონი ევროს გადახდას მოითხოვს. ევროკავშირის ფინანსური საგამოძიებო სტრუქტურების დასკვნით, სწორედ აღნიშნული თანხა უნდა გადაიხადოს ამერიკულმა კომპანიამ ევროკავშირის ბიუჯეტში.

დასკვნას წინ უსწრებდა გამოძიება, რომელიც სამი წლის განმავლობაში მიმდინარეობდა. საქმე ეხება 2003 წელს ლუქსემბურგის ხელისუფლებასა და Amazon-ს შორის გაფორმებულ შეთანხმებას. კომპანიის სათაო ოფისი ევროპაში, სწორედ ლუქსემბურგშია განთავსებული. გამოძიების შედეგად დადგინდა, რომ ამერიკული კომპანია უკანონოდ სარგებლობდა საგადასახადო შეღავათებითა და პრივილეგიებით. შეთანხმების შედეგად ირღვეოდა კანონი კონკურენციის შესახებ და კომპანია სახელმწიფო პროტექციით სარგებლობდა.

ევროკომისიის განცხადებაში ნათქვამია, რომ საგადასახადო შეთანხმება ლუქსემბურგსა და Amazon-ს შორის შეიძლება კლასიფიცირდეს, როგორც კომპანიისთვის გაწეული სახელმწიფო პროტექცია და ხელსაყრელი პირობების შექმნა.

რაც შეეხება Amazon-ის პოზიციას, კომპანიის განცხადებაში ნათქვამია, რომ ისინი არ ეთანხმებიან მოცემულ დასკვნას და მათთვის ლუქსემბურგში იგივე საგადასახადო რეჟიმი მოქმედებდა, რაც სხვა კომპანიებისთვის.

აღსანიშნავია, რომ ეს არ არის პირველი ფინანსური დავა ევროკავშირსა და ამერიკულ კომპანიებს შორის. 2017 წლის დასაწყისში ევროკავშირმა ტექნოლოგიური გიგანტი Apple 13 მილიარდი ევროთი დააჯარიმა. საქმე ირლანდიისა და Apple-ის შეთანხმებას ეხებოდა, რის შედეგადაც კომპანიამ მნიშვნელოვანი საგადასახადო შეღავათები მიიღო, ხოლო ირლანდიაში ოთხი ათასი ახალი სამუშაო ადგილი გაჩნდა.

ყოველწლიურად მსგავსი შეთანხმებების შედეგად ევროკავშირი ყოველწლიურად, დაახლოებით, 150 მილიარდ ევროს კარგავს.