ევროკავშირი განიხილავს ახალ მოდელს, რომლის მიხედვითაც მომავალ წევრ ქვეყნებს — მათ შორის უკრაინას, მოლდოვასა და მონტენეგროს შეეძლებათ ბლოკში გაწევრიანება ხმის მიცემის შეზღუდული უფლებით. ამის შესახებ Politico წერს.

ეს ინიციატივა მიზნად ისახავს ევროკავშირის გაფართოების პროცესის შეჩერებული დინამიკის აღდგენას. გაფართოებას ამ ეტაპზე უნგრეთი და რამდენიმე ქვეყანა აფერხებენ, რომლებიც შიშობენ, რომ ახალი წევრები ადგილობრივ ბაზრებზე არასასურველ კონკურენციას შექმნიან ან უსაფრთხოების ინტერესებს დააზიანებენ.

გეგმის მიხედვით, ახალ წევრებს ვეტოს უფლება დროებით შეეზღუდებათ, სანამ ევროკავშირი არ განახორციელებს ინსტიტუციურ რეფორმებს — მათ შორის გადაწყვეტილებების მიღებაზე კვალიფიციური უმრავლესობის სისტემის დანერგვას, რაც გააძნელებს ინდივიდუალური ქვეყნების მიერ საერთო პოლიტიკის დაბლოკვას.

დიპლომატების ინფორმაციით, წინადადება ამ ეტაპზე მხოლოდ არაფორმალურად განიხილება წევრ სახელმწიფოებსა და ევროკომისიაში. მისი მიზანია ახალი ქვეყნების გაწევრიანების შესაძლებლობის შექმნა მეტად მოქნილ პირობებში.

წარსულში ევროკავშირის ლიდერები მიიჩნევდნენ, რომ ახალი წევრების მიღებამდე აუცილებელი იყო ბლოკის რეფორმირება, რათა თავიდან აეცილებინათ გადაწყვეტილებების პარალიზება. თუმცა ვეტოს უფლების გაუქმებას არსებული წევრებისთვისაც მკაცრად ეწინააღმდეგებიან უნგრეთი, საფრანგეთი და ნიდერლანდები.