ევროკავშირის წევრმა ქვეყნებმა, კავშირის გარე საზღვრებზე, ახალი შესვლა-გასვლის სისტემის ამოქმედება დაიწყეს, რომლის ფარგლებშიც იმ პირების მონაცემები, რომლებიც ევროკავშირის მოქალაქეები არ არიან ელექტრონულად რეგისტრირდება. ამის შესახებ ინფორმაციას Reuters ავრცელებს.

შესვლის/გასვლის სისტემა (EES) — ეს არის ავტომატიზებული მექანიზმი, რომელიც მოგზაურებს საზღვარზე პასპორტის სკანირებასთან ერთად თითის ანაბეჭდებისა და ფოტოსურათის ჩაბარებას ავალდებულებს. სისტემა ეტაპობრივად, ექვსი თვის განმავლობაში, დაინერგება.

გადადგმული ნაბიჯი მიზნად ისახავს იმ პირების გამოვლენას, ვინც ნებადართულ ვადაზე მეტხანს რჩებიან, პირადობის მოწმობებით თაღლითობის აღკვეთას და არალეგალური მიგრაციის პრევენციას.

"შესვლა/გასვლის სისტემა არის ჩვენი ახალი საერთო ევროპული მიგრაციისა და თავშესაფრის ჩარჩოს ციფრული საყრდენი," — ნათქვამია ევროკავშირის შიდა საქმეებისა და მიგრაციის კომისრის, მაგნუს ბრუნერის განცხადებაში.

პირები, რომლებიც ევროკავშირის მოქალაქეები არ არიან პირველად შენგენის სივრცეში შესვლისას ვალდებულნი იქნებიან დარეგისტრირდნენ და მიუთითონ პირადი მონაცემები. ეს მოიცავს ევროკავშირის ყველა წევრ ქვეყანას, ირლანდიისა და კვიპროსის გარდა, თუმცა ასევე შეეხება ისლანდიას, ნორვეგიას, შვეიცარიას და ლიხტენშტეინს. შემდგომ მოგზაურობებზე მხოლოდ სახის ბიომეტრიული იდენტიფიკაცია იქნება საჭირო.

სისტემა სრულად ამოქმედდება 2026 წლის 10 აპრილს.