აშშ-ის პრეზიდენტმა დონალდ ტრამპმა დემოკრატები დაადანაშაულა იმაში, რომ იძულებული გახდა ათასობით ფედერალური თანამშრომლის გათავისუფლება დაეწყო. ამის შესახებ ინფორმაციას Reuters ავრცელებს.

ოფიციალური ინფორმაციით, სამსახურიდან გათავისუფლების პროცესი ფინანსთა სამინისტროში, ჯანდაცვის სააგენტოში, შიდა შემოსავლების სამსახურში (IRS), განათლების, ვაჭრობისა და შინაგან უსაფრთხოებაზე პასუხისმგებელი კიბერუსაფრთხოების დეპარტამენტებში უკვე დაიწყო. თუმცა, გათავისუფლებების საერთო მასშტაბი ჯერ სრულად ცნობილი არ არის.

წელს დაახლოებით 300,000 ფედერალური სამოქალაქო თანამშრომლის გათავისუფლება დატოვება ტრამპის მიერ ადრე დაწყებული შემცირების კამპანიის ფარგლებში იგეგმებოდა.

"ეს ყველაფერი მათ დაიწყეს," — განუცხადა ტრამპმა ჟურნალისტებს ოვალურ კაბინეტში გამართულ ღონისძიებაზე, გათავისუფლებებს კი "დემოკრატულად მოტივირებული ნაბიჯი" უწოდა.

მიუხედავად იმისა, რომ რესპუბლიკელებს კონგრესის ორივე პალატაში უმრავლესობა აქვთ, მათ დემოკრატების მხარდაჭერა სენატში მაინც სჭირდებათ, რათა მიიღონ კანონი, რომელიც დააფინანსებს მთავრობის მუშაობას.

დემოკრატები ჯანმრთელობის დაზღვევის სუბსიდიების გაგრძელებას მოითხოვენ, აცხადებენ, რომ მათი გაუქმება მნიშვნელოვნად გაზრდის ხარჯებს იმ 24 მილიონი ამერიკელისთვის, რომლებიც ჯანმრთელობის დაზღვევას "ხელმისაწვდომი ჯანდაცვის აქტის" (Affordable Care Act) ფარგლებში იღებენ.

ტრამპმა არაერთხელ აღნიშნა, რომ ფედერალური თანამშრომლებს გაათავისუფლებდა მთავრობის დახურვის პერიოდში.

პრეზიდენტმა ასევე დაბლოკა მინიმუმ 28 მილიარდი დოლარის ინფრასტრუქტურული ფონდები ნიუ-იორკის, კალიფორნიისა და ილინოისის შტატებისთვის — რეგიონებისთვის, სადაც დემოკრატ ამომრჩეველთა დიდი ნაწილი ცხოვრობს და რომლებიც ხშირად აკრიტიკებენ მის ადმინისტრაციას.

აშშ-ის იუსტიციის სამინისტრომ სასამართლოში წარდგენილ დოკუმენტში განაცხადა, რომ უკვე 4,200-ზე მეტმა ფედერალურმა თანამშრომელმა მიიღო გათავისუფლების შეტყობინება შვიდ უწყებაში, მათ შორის 1,400-მდე ფინანსთა სამინისტროში და მინიმუმ 1,100-მა ჯანდაცვის დეპარტამენტში.

Reuters-ის ცნობით, ფედერალური თანამშრომლების პროფკავშირებმა გათავისუფლების შესაჩერებლად სარჩელი უკვე შეიტანეს. ისინი აცხადებენ, რომ ეს ნაბიჯი მთავრობის დახურვის პერიოდში უკანონოა.

ადმინისტრაციამ პარასკევს სასამართლოში წარადგინა პოზიცია, რომ პროფკავშირებს არ აქვთ იურიდიული უფლება უჩივლონ ფედერალური პერსონალის საკადრო გადაწყვეტილებებზე.
სასამართლო სხდომა 15 ოქტომბერს ჩატარდება.

ცნობისთვის, აშშ-ის მთავრობის მუშაობა ჯერ კიდევ შეჩერებულია მას შემდეგ, რაც რესპუბლიკელმა და დემოკრატმა პოლიტიკოსებმა ბიუჯეტთან დაკავშირებულ დავაზე შეთანხმება კვლავ ვერ მოახერხეს.

ეს ნიშნავს, რომ მთავრობის ზოგიერთი, მაგრამ არა ყველა სამსახური დროებით შეჩერებულია, ხოლო ფედერალური თანამშრომლების 40% — დაახლოებით 750,000 ადამიანი — უხელფასო შვებულებაშია გაშვებული.

მიუხედავად იმისა, რომ ბიუჯეტთან დაკავშირებული დაპირისპირებები ამერიკის პოლიტიკაში ჩვეულებრივ მოვლენად მიიჩნევა, ამჯერად სიტუაცია განსაკუთრებით დაძაბულია, რადგან პრეზიდენტმა დონალდ ტრამპმა თანამდებობის დაკავების შემდეგ მნიშვნელოვნად შეამცირა ფედერალური მთავრობის ზომა და მიანიშნა, რომ შესაძლოა არსებული ჩიხი დამატებითი შემცირებებისთვის გამოიყენოს.