ევროსაბჭოს "ჟურნალისტების უსაფრთხოების პლატფორმამ" ანტიკორუფციული ბიუროს ბოლო ქმედებების გამო განგაშის სიგნალი ჩართო.

პლატფორმის განცხადებაში განხილულია გრანტების კანონში ცვლილებების ამოქმედების შემდეგ რა ბედი ეწიათ მედიებსა და არასამთავრობო ორგანიზაციებს. 2025 წლის აპრილში კანონმდებლობაში შესული ცვლილებების საფუძველზე, 8 სექტემბერს 30-მდე ორგანიზაციას სამართლებრივი საფუძვლის გარეშე თავიანთი საქმიანობის შესახებ უწყებისთვის დეტალური ინფორმაციის მიწოდება დაევალათ.

2 ოქტომბერს 60-ზე მეტ მედიასა და სამოქალაქო ორგანიზაციას დაევალა დონორებისა და გრანტების შესახებ ინფორმაციის გამჟღავნება, მათ შორის არიან —"მთის ამბები", Project 64 და "აი, ფაქტი".

პლატფორმა ქართულ ოცნებას მოუწოდებს გააუქმოს ბოლო საკანონმდებლო ცვლილებები და შეწყვიტოს მედიის თვითნებური შემოწმებები.

"საქართველოს ხელისუფლებამ უნდა შეწყვიტოს მედიის მხარდამჭერი და სამოქალაქო ორგანიზაციების თვითნებური შემოწმებები, გააუქმოს 2025 წლის აპრილში მიღებული ცვლილებები გრანტების შესახებ კანონში და დაასრულოს კანონმდებლობის ბოროტად გამოყენება დამოუკიდებელი ჟურნალისტიკის დასაშინებლად. გრანტებსა და უცხოურ დაფინანსებასთან დაკავშირებული კანონები უნდა იყოს გამჭვირვალე და შეესაბამებოდეს ასოციაციისა და გამოხატვის თავისუფლების საერთაშორისო სტანდარტებს," — ვკითხულობთ განცხადებაში.