"ლელო — ძლიერი საქართველოს" ლიდერმა, მამუკა ხაზარაძემ საარჩევნო უბანზე საკუთარი არჩევანი უკვე გააკეთა. მან ხმის მიცემის შემდეგ ჟურნალისტებთან განაცხადა, რომ “ხმა მისცა იმ ქალაქების, სოფლებისა და მუნიციპალიტეტების გათავისუფლებას, რომელიც რეალურად ქართველ ხალხს ეკუთვნის და არა რაღაც ბანდას”.

"ძალიან მნიშვნელოვანია, რომ მოქალაქეებმა, თბილისელებმა და სხვა მუნიციპალიტეტში მცხოვრებმა მოქალაქეებმა გამოხატონ თავიანთი კონსტიტუციური უფლება და არ აჩუქონ თავიანთი ხმა იმ ძალას, რომელმაც ქვეყანა ჩამოაშორა თავისუფალ არჩევანს, ევროპულ არჩევანს იზოლაცია გაუკეთა და ქვეყანა შეიყვანა საკმაოდ სერიოზულ კრიზისში, კორუფციის ჭაობში, კრიმინალურ ჭაობში და ა.შ. ამიტომ ხმა მივეცი იმ ქალაქების, სოფლებისა და მუნიციპალიტეტების გათავისუფლებას, რომელიც რეალურად ქართველ ხალხს ეკუთვნის და არ ეკუთვნის რაღაც ბანდას, რომელსაც ჩვენი ისტორიული არჩევანი აქვს შეცვლილი.

[…] მინდა ყველა გავაფრთხილო, პირველ რიგში, ე.წ. ხელისუფლება, რომ თმის ღერი არ უნდა ჩამოუვარდეს არავის. მათი მუქარა არ დარჩება პასუხგაუცემელი. ეს არის ძალიან მყარი პოზიცია ჩვენი. თუმცა კიდევ ვიმეორებ — არ მჯერა რაღაც კრებით ხელისუფლების გადაცემის, ეს მე მკაფიოდ ვთქვი. ყველამ უნდა აიღოს პოლიტიკური პასუხისმგებლობა", ­ — განაცხადა მამუკა ხაზარაძემ.

4 ოქტომბრის თვითმმართველობის არჩევნებში მონაწილეობაზე უარს ამბობს 8 ოპოზიციური პარტია, მათ შორის ის 2 კოალიცია — ცვლილებისთვის და ნაციონალური მოძრაობა, რომლებმაც ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

ბოიკოტის რეჟიმში მყოფი ოპოზიციური პარტიები აცხადებენ, რომ არჩევნებში შესვლა ოცნებისთვის ლეგიტიმაციის მიცემას ნიშნავს და სასურველ ციფრებს ოცნება მაინც დაიწერს. თვითმმართველობის არჩევნების დღეს, 4 ოქტომბერს ოპოზიციური პარტიები და აქტივისტები რუსთაველზე აქციას გამართავენ. ორგანიზატორებს შორის არიან ნაციონალური მოძრაობის და მოძრაობა რუსთაველის გამზირის წარმომადგენლები. ისინი აცხადებენ, რომ ამ დღეს ოცნების ხელისუფლებას "მშვიდობიანად დაამხობენ".