ქართული ოცნების დანიშნულმა პრეზიდენტმა, მიხეილ ყაველაშვილმა განაცხადა, რომ ნიუ-იორკში გამართულ ვახშამზე დონალდ ტრამპს შეხვდა და უთხრა, რომ "დროა, ჩვენი ურთიერთობა ახალი ფურცლიდან დაიწყოს". ყაველაშვილის განცხადებით, აშშ-ის პრეზიდენტი დაჰპირდა, რომ ამ თემას დაუბრუნდება და მას დაუკავშირდება.

"საზოგადოებას ალბათ ვახშამი აინტერესებს, რომელიც გამართა ამერიკის შეერთებული შტატების პრეზიდენტმა, სადაც მოხდა ჩვენი შეხვედრა. მას განვუცხადე, რომ დროა, ჩვენი ურთიერთობა ახალი ფურცლიდან დაიწყოს, რაზეც მიპასუხა, რომ მიხედავს ამ საკითხს. დამპირდა, რომ აუცილებლად დაუბრუნდება ამ თემას და დამიკავშირდება. დაველოდოთ მის პასუხს. გვქონდა სხვა არაერთი სხვა შეხვედრაც ადმინისტრაციასთან, ვაჭრობის მდივანთან," — მიხეილ ყაველაშვილის კომენტარს პირველი არხი ავრცელებს.

შეგახსენებთ, გუშინ მიხეილ ყაველაშვილი გაეროს გენერალური ასამბლეის მე-80 სესიაზე სიტყვით გამოვიდა. გამოსვლისას მან განაცხადა, რომ "საქართველოს ხელისუფლების ძირეულ ფილოსოფიად რჩება შევინარჩუნოთ მშვიდობა და რადაც არ უნდა დაგვიჯდეს, ხალხს თავიდან ავარიდოთ ომი"; თქვა, რომ საქართველოს 20% ოკუპირებულია, 2008 წლისა და უკრაინის ომები, მაგრამ არც საქართველოს და არც უკრაინის კონტექსტში არ უხსენებია რუსეთი როგორც ოკუპანტი და დამპყრობელი, არც საქართველოს ევროკავშირსა და NATO-ში გაწევრიანების მისწრაფება.