ოცნების დანიშნულმა პრეზიდენტმა, მიხეილ ყაველაშვილმა გაეროს გენერალური ასამბლეის მე-80 სესიაზე სიტყვით გამოსვლისას განაცხადა, რომ "საქართველოს ხელისუფლების ძირეულ ფილოსოფიად რჩება შევინარჩუნოთ მშვიდობა და რადაც არ უნდა დაგვიჯდეს, ხალხს თავიდან ავარიდოთ ომი". თქვა, რომ საქართველოს 20% ოკუპირებულია, 2008 წლისა და უკრაინის ომები, მაგრამ არც საქართველოს და არც უკრაინის კონტექსტში არ უხსენებია რუსეთი როგორც ოკუპანტი და დამპყრობელი, არც საქართველოს ევროკავშირსა და NATO-ში გაწევრიანების მისწრაფება.

"ჩვენს გარშემო არსებული მრავალი გამოწვევის მიუხედავად, ჩვენ შევძელით ჩვენი ხალხის უსაფრთხოების უზრუნველყოფა. საქართველოს ხელისუფლების ძირეულ ფილოსოფიად რჩება შევინარჩუნოთ მშვიდობა და რადაც არ უნდა დაგვიჯდეს, ჩვენს ხალხს თავიდან ავარიდოთ ომი", — თქვა მიხეილ ყაველაშვილმა.

რაც შეეხება უკრაინის ომს, მისი თქმით, 2008 წლის "იარები დღემდე არ მოუშუშებია ქართველ ხალხს, ბევრზე უკეთ გვესმის ის ტკივილი, რასაც დღეს უკრაინელი ერი განიცდის".

"უკვე მეოთხე წელია, რაც უკრაინაში საშინელი, სისხლისმღვრელი ომი მიმდინარეობს, რომელსაც კატასტროფული შედეგები და უზარმაზარი ადამიანური მსხვერპლი მოჰყვა. 2008 წლის ომის მწარე გამოცდილების გათვალისწინებით, რომლის იარები დღემდე არ მოუშუშებია ქართველ ხალხს, ჩვენ ბევრზე უკეთ გვესმის ის ტკივილი, რასაც დღეს უკრაინელი ერი განიცდის. დღესაც, როგორც უწინ, საქართველო უკრაინელი ხალხის მიმართ მტკიცე და ურყევ მხარდაჭერას გამოხატავს", — განაცხადა მან.

ამას გარდა, მიხეილ ყაველაშვილმა აფხაზ და ოს დებსა და ძმებს მიმართა და თქვა, რომ "საოკუპაციო ხაზის მიღმა მყოფ თანამოძმეებს ყოველთვის ღია გულით და გაშლილი ხელით შეგხვდებით".

"ჩემო აფხაზო, ოსო ძმებო და დებო ჩვენი კულტურული კოდი არ შეცვლილა — ჩვენთვის მრავალფეროვნება არა პრობლემა, არამედ კვლავ არსებობის აუცილებელი ფორმულაა, ამიტომ საოკუპაციო ხაზის მიღმა მყოფ თანამოძმეებს ყოველთვის ღია გულით და გაშლილი ხელით შეგხვდებით.

ჩვენი ვალია, რომ ერთობლივი ძალისხმევით გადავლახოთ ხელოვნურად შექმნილი დაბრკოლებები, აღვადგინოთ ჩატეხილი ხიდები, წარსული წყენები კი, როგორც გამორჩეულმა, სულგრძელმა ხალხმა წარსულს მივაბაროთ"