დაპატიმრებულმა ბიზნესმენმა, გიორგი ჩიკვაიძემ შიმშილობა დაიწყო. ამის შესახებ ინფორმაციას ჩიკვაიძის დედა, ეკა წერეთელი სოციალურ ქსელში ავრცელებს.

"პოლიტპატიმარმა გიორგი ჩიკვაიძემ შ ი მ შ ი ლ ო ბ ა გამოაცხადა... დღეს 23 სექტემბერს მასზე განხორციელებული ზეწოლების გამო...

პასუხისმგებლობა ეკისრება გლდანის მე-8 დაწესებულების ახალ დირექტორს, რამაზ ფირცხალავას.

P.s. პოლიტპატიმრის მშობლებისადმი უდიდესი პატივისცემის მიუხედავად, გთხოვათ, არ მოუწოდოთ შიმშილობის შეწყვეტისაკენ." — წერს ეკა წერეთელი.

ამასთან, გიორგი ჩიკვაიძის დედამ გუშინ, 22 სექტემბერს გაავრცელა ინფორმაცია, რომ "ნოდარ მელაძის შაბათში" გასული რეპორტაჟის შემდეგ, რომელიც ქოლ-ცენტრებს ეხებოდა, ჩიკვაიძეს პირადი პაემნები, კერძოდ მშობლებთან პირისპირ შეხვედრა აეკრძალა.

ცნობისთვის, დაპატიმრებულმა ბიზნესმენმა შიმშილობა მიმდინარე წლის 12 მარტსაც გამოაცხადა. 9-დღიანი შიმშილობის შემდეგ ჩიკვაიძის მდგომარეობა დამძიმდა და ის საავადმყოფოში გადაიყვანეს.

შეგახსენებთ, 11 მარტს დიდი ოდენობით თანხების მართლსაწინააღმდეგო მითვისების ფაქტზე ბრალდებულ ბიზნესმენს, გიორგი ჩიკვაიძეს აღკვეთის ღონისძიების სახით შეფარდებული 50 000-ლარიანი გირაო პატიმრობით შეეცვალა. ის სასამართლოს სხდომათა დარბაზშივე დააკავეს. მან მოსამართლე იზა კელენჯერიძეს "მურუსიძის მონა" უწოდა და თქვა, რომ ყველაფერს გააკეთებს მის დასასანქცირებლად.

თბილისის საქალაქო სასამართლომ 7 მაისს გამართულ სხდომაზე ბიზნესმენს, "რამზეს იახტების" დამფუძნებელ გიორგი ჩიკვაიძეს 9 წლით თავისუფლების აღკვეთა მიუსაჯა, მის პარტნიორ ირაკლი პაპიაშვილს კი — 8 წლით. მათ ბრალად დიდი ოდენობით თანხის ჯგუფურად მითვისება და გაფლანგვა ედებოდათ. ეს სისხლის სამართლის 182-ე მუხლია, რომელიც 3-დან 12 წლამდე პატიმრობას ითვალისწინებს.

ასევე იხილეთ: