ოცნების პარლამენტის იურიდიული კომიტეტის თავმჯდომარემ, არჩილ გორდულაძემ განაცხადა, რომ მმართველმა პარტიამ ისეთი კანონპროექტი შეიმუშავა, რომელიც თანხის მითვისების "ცდუნებას" გამორიცხავს.

"შემუშავებულ იქნა ისეთი კანონპროექტი, რომელიც გამორიცხავს და მინიმუმამდე დაიყვანს შესაძლებლობას, მათ შორის, ადამიანების "ცდუნებას", რომ თანხები მიითვისონ.

30 წლის განმავლობაში მათ ექნებათ ვალდებულება, რომ ნებისმიერი ქონებრივი ტრანზაქციები იქნება, თუ გადარიცხვები ყველაფერთან დაკავშირებით შესაბამისი ინფორმაცია წარადგინონ, რაც საჯარო იქნება," — განაცხადა გორდულაძემ იმედის ეთერში.

22 სექტემბერს, ქართულმა ოცნებამ ბიუროზე დაარეგისტრირა კანონპროექტი, რომლის მიხედვითაც საჯარო მოხელეები და პოლიტიკური თანამდებობის პირები, რომლებმაც სამოხელეო ან ფინანსური დანაშაულები ჩაიდინეს, ვალდებულები იქნებიან 30 წლის განმავლობაში ყოველწლიურად ქონებრივი დეკლარაცია შეავსონ.

საპარლამენტო უმრავლესობის ლიდერმა, ირაკლი კირცხალიამ პარლამენტში გამართულ ბრიფინგზე განაცხადა, რომ კანონმდებლობაში შეტანილი ცვლილებით გასამართლებული პირები ვეღარ შეძლებენ "მითვისებული ქონების ლეგალიზებასა და პირადი ინტერესებით გამოყენებას, სასჯელის მოხდის შემდეგაც".