საპარლამენტო უმრავლესობის ლიდერმა, ირაკლი კირცხალიამ პარლამენტში გამართულ ბრიფინგზე განაცხადა, რომ "კორუფციის წინააღმდეგ ბრძოლის შესახებ" კანონს ამკაცრებენ. ცვლილებების თანახმად, საჯარო მოხელეები და პოლიტიკური თანამდებობის პირები, რომლებმაც სამოხელეო ან ფინანსური დანაშაულები ჩაიდინეს, ვალდებულები იქნებიან 30 წლის განმავლობაში ყოველწლიურად ქონებრივი დეკლარაცია შეავსონ.

"საკანონმდებლო ცვლილებების თანახმად, ანტიკორუფციული ბიუროსთვის ქონებრივი მდგომარეობის დეკლარაციის ყოველწლიურად — 30 წლის განმავლობაში წარდგენის ვალდებულება ექნებათ საჯარო მოხელეებს, პოლიტიკური თანამდებობის პირებს, ა(ა)იპ-ებში, სსიპ-ებში და სახელმწიფო საწარმოებში დასაქმებულ პირებს, იმ შემთხვევაში, თუ მათ მიმართ კანონიერ ძალაში შევა გამამტყუნებელი განაჩენი საქართველოს სისხლის სამართლის კოდექსით გათვალისწინებული სამოხელეო ან ფინანსური დანაშაულების ჩადენისათვის," — განაცხადა კირცხალიამ.

კირცხალიას განმარტებით, კანონმდებლობაში შეტანილი ცვლილებით გასამართლებული პირები ვეღარ შეძლებენ "მითვისებული ქონების ლეგალიზებასა და პირადი ინტერესებით გამოყენებას, სასჯელის მოხდის შემდეგაც".

"ეს ცვლილებები პირდაპირი სიგნალია იმ ადამიანებისთვის, რომლებიც კორუფციულ გარიგებებში ჩართულობით, სავარაუდო სარგებლის მიღებაზე, შემდეგ შემოსავლის ლეგალიზებაზე და გრძელვადიან პერიოდში პირადი ინტერესების დაკმაყოფილებაზე არიან ორიენტირებულნი. მინდა საზოგადოებას განვუმარტო, რომ ცვლილებების ამოქმედების შემდეგ, კონკრეტულ სამოხელეო დანაშაულში მხილებული ადამიანების ქონებრივი მდგომარეობის აქტიური დაკვირვება და მონიტორინგი 30 წლის განმავლობაში გახდება შესაძლებელი, რაც ფაქტობრივად, მათი მხრიდან მითვისებული ქონების ლეგალიზებასა და პირადი ინტერესებით გამოყენებას, სასჯელის მოხდის შემდეგაც გამორიცხავს," — დასძინა კირცხალიამ.

კანონმდებლობაში ცვლილების დაანონსებამდე კირცხალიამ ისაუბრა ქართული ოცნების ბრძოლაზე კორუფციის წინააღმდეგ. მისი განცხადებით მმართველმა პარტიამ 13 წლის განმავლობაში "მნიშვნელოვან შედეგებს მიაღწია" და პარლამენტი "სრულიად მხარს უჭერს, საქართველოს პრემიერ-მინისტრის გაცხადებულ კურსს, რომელიც კორუფციის წინააღმდეგ უკომპრომისო ბრძოლას უკავშირდება". კირცხალიამ ასევე დასძინა, რომ "უკანასკნელ პერიოდში სახელმწიფო უსაფრთხოების სამსახურის მიერ კორუფციის წინააღმდეგ ბრძოლის მიმართულებით განხორციელებული ეფექტიანი ღონისძიებები და გამოვლენილი დანაშაულები დასტურია, რომ სახელმწიფო, მსგავსი ტიპის დანაშაულის მიმართ უკომპრომისო და შეურიგებელია".

ცნობისთვის, 4 სექტემბერს კანონმდებლობაში შეტანილი ცვლილებებით, ფინანსური დანაშაულების ჩამდენი პირებისგან ზარალის დაფარვის მიზნით ბრალდებულების ოჯახის წევრებისგან ქონების ამოღება გამარტივდა.

"იმ შემთხვევაში თუ ადამიანი ჩაიდენს ფინანსურ დანაშაულს, ეკონომიკურ დანაშაულს და მიაყენებს კონკრეტულ მეორე ადამიანს ზიანს, ამ მეორე ადამიანის ზიანის ანაზღაურების გამარტივების მიზნით, მარტივდება დამნაშავისგან, ოჯახის წევრებისგან და ასევე დაკავშირებული პირებისგან ქონების თანხის ამოღება. ეს თუ ხანგრძლივ და სხვადასხვა პროცედურას მოითხოვდა, მათ შორის სამოქალაქო დავას, რომელიც წლები გრძელდებოდა, ეს ახლა იქნება გამარტივებული," — განაცხადა 11 ივნისს საპარლამენტო სხდომაზე მამუკა მდინარაძემ.

მოგვიანებით პარლამენტის იურიდიული კომიტეტის თავმჯდომარემ, არჩილ გორდულაძემ განაცხადა, რომ წარმოდგენილი ცვლილებები ბიძინა ივანიშვილთან სამართლებრივ დავაში მყოფ გიორგი ბაჩიაშვილზეც გავრცელდება.

"ნებისმიერი პირი, ვინც არ უნდა იყოს, თუნდაც გიორგი ბაჩიაშვილი, დიახ, გიორგი ბაჩიაშვილზეც გავრცელდება წარმოდგენილი ცვლილებები, ამას არ აქვს მნიშვნელობა კონკრეტული ადამიანის სახლი და გვარი რა არის და როგორია. მთავარია, რომ ჩაიდანა თუ არა ამ ადამიანმა დანაშაული და სხვა ადამიანს მიაყენა თუ არა ზიანი. კონკრეტული სახელისა და გვარის ქონა, რა თქმა უნდა, ადამიანს ვერ გაათავისუფლებს პასუხისმგებლობისგან და სხვა ადამიანს ზიანს აუნაზღაურებს, ესაა მარტივი ლოგიკა," — განაცხადა გორდულაძემ.

13 სექტემბერს, პროკურატურის განცხადებით, გიორგი ბაჩიაშვილის ოჯახის წევრების ანგარიშებსა და აქტივებს ყადაღა დაედო. The Guardian-მა პატიმრობაში მყოფ "თანაინვესტირების ფონდის" ყოფილ ხელმძღვანელ გიორგი ბაჩიაშვილზე სტატია გამოაქვეყნა. ბრიტანული გამოცემა წერს, რომ მას შემდეგ, რაც ბაჩიაშვილის დედასთან, მარინა რამაზაშვილთან ინტერვიუ გამოაქვეყნეს, სადაც ის ბიძინა ივანიშვილს აკრიტიკებს, ბაჩიაშვილის მშობლებს საბანკო ანგარიშები გაუყინეს. მარინა რამაზაშვილი ინტერვიუში აცხადებს, რომ მისი ვაჟი, გიორგი ბაჩიაშვილი, მილიარდერი პოლიტიკოსის, ბიძინა ივანიშვილის "ვენდეტის" მსხვერპლი გახდა.