პატრიოტთა ალიანსის დეპუტატებმა, ადა მარშანია, ნატო ჩხეიძე და გიორგი ლომია რუს კოლეგებს დღეს, 3 ოქტომბერს შეხვდნენ. რუსთავი 2-ის ინფორმაციით, შეხვედრაზე ქართველი პარლამენტარები საქართველოში მოსკოვის მონაწილეობით საერთაშორისო ფორუმის ჩატარების ინიციატივით გამოვიდა.

"არ არის საჭირო ულტიმატუმები. ჩვენ შეგვიძლია ვითანამშრომლოთ რუსეთთან და ნატოსთანაც ისე, რომ რუსეთმა საქართველოს ტერიტორიიდან საფრთხე ვერ იგრძნოს", - განაცხადა გიორგი ლომიამ.

ქართველმა და რუსმა დეპუტატებმა, ასევე, ისაუბრეს აფხაზეთის ტერიტორიის გავლით რკინიგზის ფუნქციონირებასთან და წინაპრების საფლავების მონახულების საკითხებთან დაკავშირებით.

"რატომღაც საქართველოს ხელისუფლებამ უარი თქვა რუსეთის დახმარებაზე. თუმცა ბორჯომის რუსეთში შემოტანაზე უარი ხომ არ უთქვამთ. ნუთუ არ ეცოდებათ საკუთარი ტყე? რუსეთისა და საქართველოს საგანგებო სიტუაციების უწყებებს შორის დიალოგის დონეზე უნდა დალაგდეს, ან სპეციალური არხის ან პროტოკოლის ჩამოყალიბებით", - უთხრა რუსეთის სახელმწიფო მედია RIA-ს დუმის დსთ-ის საქმეთა კომიტეტის ხელმძღვანელმა, ლეონიდ კალაშნიკოვმა.

პატრიოტთა ალიანსის წევრები, დეპუტატების რანგში, მოსკოვში ვიზიტით უკვე მეორედ იმყოფებიან. პირველ შეხვედრაზე მათ რუს კოლეგებს რუსეთ-საქართველო-ნატოს "ტრიადის" შექმნა შესთავაზეს.