მოსამართლე ფიქრია სიქტურაშვილმა 625 მილიონი დოლარისა და 35 მილიონი ევროს გათეთრების ბრალდებით დაკავებულ 49 წლის კახა კოტორაშვილს აღკვეთის ღონისძიების სახით პატიმრობა შეუფარდა.

კახა კოტორაშვილთან ერთად საქმეში კიდევ ერთი სახელი და გვარი გამოიკვეთა — მოსამართლის თქმით, " ფულის გათეთრება კოტორაშვილმა და ელდარ ხუსეინოვმა განიზრახეს".

კახა კოტორაშვილის ადვოკატის, ედიშერ ქარჩავას ინფორმაციით, საქმეზე გამოძიება ერთი წელია, მიმდინარეობს და კოტორაშვილის მიმართ კითხვები შარშან ოქტომბერში გაჩნდა.

პროკურორი ზინიკო ქობალია აცხადებს, რომ ფული ქვეყანაში საბაჟო პროცედურების გვერდის ავლით აზერბაიჯანიდან შემოდიოდა, დაახლოებით 58 მილიარდი რუბლის გათეთრება 2022-2024 წლებში უწყვეტად ხორციელდებოდა, პროცესი კი საბაჟო კონტროლის გვერდის ავლით იწყებოდა, შემდეგ თანხა გადამხურდავებელ ჯიხურებში ხვდებოდა და ბოლოს კომერციულ ბანკებში ირიცხებოდა.

პროკურორის თქმით, "ბრალდებული მის საკუთრებაში არსებულ ვალუტის გადამცვლელ პუნქტს იყენებდა, როგორც კრიმინალურ ინფრასტრუქტურას, სადაც ხდებოდა დაუსაბუთებელი თანხების თავმოყრა. აღნიშნული თანხები თავის მხრივ, დანაშაულებრივი სქემის მიხედვით, პირველ ეტაპზე მოსაზღვრე ქვეყნიდან შემოტანილი იყო საბაჟო პროცედურების გვერდის ავლით, ავტომანქანებში მოწყობილი სპეციალური სამალავების გამოყენებით. შემდგომ ეტაპზე, ხდებოდა აღნიშნული თანხის კომერციულ ბანკებში მიტანა, სადაც დანაშაულებრივი ჯგუფის წევრები, მათ შორის, ბრალდებული უთითებდა ყალბ ინფორმაციას თანხის წარმომავლობის შესახებ", — აცხადებს პროკურორი ზინიკო ქობალია.

დაცვის მხარე 50 000 ლარის გირაოს გამოყენებას ითხოვდა, ბრალდებული კი დუმილის უფლებას იყენებს. შემდეგი სხდომა 10 ნოემბერს, 11:00 საათზე, ჩანიშნა.