Netflix-ის ფილმის, "ტინდერის თაღლითის" გმირს სიმონ ლევიევს, რომელიც ისრაელის მოქალაქეა, საქართველოში წინასწარი პატიმრობა შეუფარდეს. გამოცემა "ბათუმელების" ინფორმაციით, საქმე მოსამართლე ნინო სახელაშვილმა განიხილა და ბრალდებულს საექსტრადიციო პატიმრობა ბათუმში შეეფარდა.

New York Times-ის ცნობით, გერმანიაში ლევიევი ქალის მოტყუების ბრალდებით დააკავეს. კერძოდ, მას ბრალად ედებოდა დაზარალებულისგან თითქმის 44 ათასი ევროს მოპარვა და საკრედიტო ბარათისა და ტელეფონის გამოყენებით ათასობით დოლარის მითვისება.

გამოცემის ცნობით, ლევიევი საქართველოში გერმანიის მოთხოვნით დააკავეს.

Nyt-ის ინფორმაციით, ის სამი თვით პატიმრობაში დარჩება, ან იმ დრომდე, სანამ გერმანია მის ექსტრადირებას არ მოახდენს. ადვოკატის თქმით, ლევიევი უარყოფს ბრალდებებს და არ ესმის, რატომ არ მოითხოვა გერმანიამ მისი დაკითხვა ან ექსტრადიცია პირდაპირ ისრაელიდან.

როგორც ადვოკატმა საგივ როტენბერგმა New York Times-ს აცნობა, მისი დაცვის ქვეშ მყოფი საქართველოში დაკავებას ასაჩივრებს და გერმანიაში საქმის შეწყვეტას მოითხოვს.

"უკიდურესად მკაცრი პატიმრობის პირობებში იმყოფება, სათანადო კვების გარეშე და უმეტესად ხელბორკილებით," — განუცხადა 16 სექტემბერს ადვოკატ საგივ როტენბერგმა New York Times-ს.

მისივე თქმით, ლევიევი უარყოფს ბრალდებებს და არ ესმის, რატომ არ მოითხოვა გერმანიამ მისი დაკითხვა ან ექსტრადიცია პირდაპირ ისრაელიდან.

სიმონ ლევიევი 34 წლისაა. მისი ნამდვილი სახელი შიმონ ჰაიუტია. იგი ცნობილი გახდა Netflix-ის 2022 წლის დოკუმენტური ფილმის შემდეგ, რომლის თანახმადაც ლევიევი, რომელსაც რამდენიმე ფსევდონიმი აქვს, ონლაინ აპლიკაცია Tinder-ზე ქალებს ეცნობოდა მდიდარი ოჯახის მემკვიდრედ და თაღლითური სქემის გამოყენებით მათ ფულს სძალავდა. ლევიევი 2019 წელს ისრაელში დააკავეს და თაღლითობისთვის 15-თვიანი პატიმრობა მიუსაჯეს, თუმცა 5 თვის შემდეგ ის ციხიდან გაათავისუფლეს.