ჰელსინკის კომისია დღეს საქართველოს შესახებ მოსმენას სახელწოდებით "პარტნიორიდან პრობლემამდე: საქართველოს ანტიამერიკული შემობრუნება" გამართავს. კომისია საქართველოს მეხუთე პრეზიდენტს, სალომე ზურაბიშვილს; საქართველოს თავდაცვის ყოფილ მინისტრს თინათინ ხიდაშელს და ჰადსონის ინსტიტუტის უფროს მკვლევარს ლუკ კოფის მოუსმენს. ამის შესახებ ინფორმაციას "ჰელსინკის კომისია" ავრცელებს.

კომისიის მიერ გავრცელებულ განცხადებაში აღნიშნულია, რომ ქართული ოცნება ქვეყანას რუსეთთან და ჩინეთთან აახლოებს და ქვეყნის სუვერენიტეტს ძირს უთხრის.

"საქართველო ერთ დროს აშშ-ის მთავარი პარტნიორი და თავისუფლების შუქურა იყო კავკასიაში. დღეს მმართველი პარტია ქართული ოცნება ქვეყანას რუსეთის ორბიტაზე აბრუნებს და ჩინეთთან და აშშ-ის სხვა მეტოქეებთან ურთიერთობებს აღრმავებს. ბოლო რამდენიმე წლის განმავლობაში, ქართულმა ოცნებამ საქართველოს ინსტიტუტები დაასუსტა და ძირი გამოუთხარა საქართველოს სუვერენიტეტს ჩინური ინვესტიციების მოზიდვით, ამავდროულად კი, აშშ-ის კომპანიებისთვის შუა დერეფნის ვაჭრობასა და ცენტრალური აზიის იშვიათ მინერალებზე წვდომის დაბლოკვით. მათ დააპატიმრეს ოპოზიციის წარმომადგენლები, იძალადეს მშვიდობიან დემონსტრანტებზე და უარი თქვეს ძალაუფლების დათმობაზე არჩევნების შემდეგ, რომელიც არალეგიტიმურად ფართოდ იქნა აღიარებული. ეს რეგიონში აშშ-ის ინტერესებს დაუყოვნებელ და სერიოზულ საფრთხეს უქმნის.

ეს მოსმენა განიხილავს გლობალურ შედეგებს, რაც შეიძლება საქართველოს ავტორიტარიზმისკენ გადახრამ შეიძლება გამოიწვიოს. მოწმეები ასევე განიხილავენ აშშ-ის პოლიტიკის შესაძლო არჩევანს, მაგალითად, ორპარტიული MEGOBARI აქტის მიღებას, რათა დაეხმარონ ქართველ ხალხს შეინარჩუნონ დამოუკიდებლობა და გრძელვადიანი, ორმხრივად მომგებიანი ურთიერთობა შეერთებულ შტატებთან", — წერია ჰელსინკის კომისიის მიერ გავრცელებულ განცხადებაში.

მოსმენა დღეს, თბილისის დროით 22:30-ზე დაიწყება.