10 სექტემბერს ჰელსინკის კომისიის სხდომაზე საქართველოს საკითხზე მოსმენა გაიმართება. ამის შესახებ ინფორმაცია ჰელსინკის კომისიის ვებგვერდზე გავრცელდა. კომისია საქართველოს მე-5 პრეზიდენტ სალომე ზურაბიშვილს, ყოფილ თავდაცვის მინისტრ თინათინ ხიდაშელს და ჰადსონის ინსტიტუტის უფროს მკვლევარ ლუკ კოფის მოუსმენს.

ჰელსინკის კომისიის სხდომა 10 სექტემბერს, თბილისის დროით 06:30 საათზე გაიმართება.

კომისიის მიერ გავრცელებულ განცხადებას ასეთი სათაური აქვს: "პარტნიორიდან პრობლემამდე: საქართველოს ანტიამერიკული შემობრუნება".

"საქართველო ოდესღაც აშშ-ის მთავარი პარტნიორი და კავკასიაში თავისუფლების შუქურა იყო. დღეს მმართველი პარტია ქართული ოცნება ქვეყანას რუსეთის ორბიტაზე აბრუნებს და ჩინეთთან და აშშ-ის სხვა მოწინააღმდეგეებთან ურთიერთობას აღრმავებს. ბოლო რამდენიმე წლის განმავლობაში ქართულმა ოცნებამ დაშალა საქართველოს ინსტიტუტები და კიდევ უფრო შეარყია საქართველოს სუვერენიტეტი ჩინური ინვესტიციების მოზიდვით, ამავდროულად, ბლოკავს ამერიკულ ბიზნესს "შუა დერეფნის" გზით ვაჭრობასა და ცენტრალური აზიის იშვიათ მინერალებზე წვდომაში. ხელისუფლებამ დააპატიმრა ოპოზიციის წარმომადგენლები, გამოიყენა ძალადობა მშვიდობიანი დემონსტრანტების წინააღმდეგ და უარი თქვა ძალაუფლების დათმობაზე ისეთი არჩევნების შემდეგ, რომლებიც ფართოდ იქნა აღქმული, როგორც არალეგიტიმური. ეს სერიოზულ საფრთხეს უქმნის აშშ-ის ინტერესებს რეგიონში.

მოსმენის მიზანია გაანალიზდეს საქართველოს ავტორიტარიზმისკენ სვლის გლობალური შედეგები. მოწმეები ასევე განიხილავენ აშშ-ის შესაძლო ნაბიჯებს, მათ შორის ორპარტიული "MEGOBARI-ის აქტის" მიღებას, რომელიც მიზნად ისახავს ქართველ ხალხს შეუნარჩუნოს დამოუკიდებლობა და გაგრძელდეს აშშ-სთან ხანგრძლივი და ურთიერთსასარგებლო თანამშრომლობა", — წერია გავრცელებულ განცხადებაში.