"დღევანდელი გადაწყვეტილება პრეზიდენტის იმაზე მეტყველებს, რომ აურზაური და დაპირისპირება შემოიტანოს ოპოზიციურ ფლანგზე" — ამის შესახებ კოალიცია ლელო — ძლიერი საქართველოს ლიდერმა მამუკა ხაზარაძემ რუსთავის ციხის დატოვების შემდეგ ჟურნალისტებს განუცხადა.

მისი თქმით, ის, რაც დღეს გააკეთა ე.წ. პრეზიდენტმა არის "სამართლებრივი ნონსენსი".

ხაზარაძემ კიდევ ერთხელ დაადასტურა, რომ ლელო — ძლიერი საქართველო თვითმმართველობის არჩევნებში მონაწილეობას მიიღებს. მისი თქმით, ამის შესახებ გადაწყვეტილება ციხეში ყოფნის დროს მიიღეს.

"დღევანდელი გადაწყვეტილება იყო აბსოლუტურად მოულოდნელი. ჩვენ შეგნებულად წავედით ამ ნაბიჯზე, მე და ბადრი ჯაფარიძე არ ვეთანხმებით იმ მოცემულობას, რაც ქვეყანაშია შექმნილი, ეს არის არალეგიტიმური პარლამენტი, ეს არის მიტაცებული პარლამენტი, ეს არის მიტაცებული პრეზიდენტის სავარძელი. მიუხედავად იმისა, რომ მან დღეს შეწყალებით გამოგვიშვა. გასაგებია, რომ მადლიერების გრძნობა მე არ მაკლია, მაგრამ ეს არის მუხანათური, პირდაპირ ვიტყვი ძალიან ბინძური საქციელი, როცა ჩვენი თანამებრძოლები ზუსტად იმავე მუხლით, იმავე "დანაშაულით" იხდიან სასჯელს.

დღეს მე და ბადრი ჯაფარიძის გამოშვება, რომელსაც არ ველოდებოდით, რადგან 8-თვიანი ვადის ამოწურვას ველოდებოდით, გამოგვიშვეს მხოლოდ და მხოლოდ ერთი რამის გამო, რომ მოხდეს დაპირისპირება მოხდეს შავი ნიაღვრის და პიარის და გადმოსხმა, რაც არ გამოუვათ იმიტომ რომ ის, რაც დღეს გააკეთა ე.წ. პრეზიდენტმა ეს არის სამართლებრივი ნონსენსი, ეს არის მანიპულირება ადამიანების თავისუფლებით, ეს არის კანონის ფეხქვეშ გათელვა ეს არის ადამიანებით ვაჭრობა და მე პირდაპირ გეუბნებით — თუ უახლოეს დღეებში ე.წ. პრეზიდენტი არ გამოუშვებს იმ დარჩენილ პოლიტპატიმრებს რომლებიც იმავე მუხლით არიან დაპატიმრებულები, ეს იქნება ყველაზე დიდი ლუსტრაცია იმისა, რომ ბიძინა ივანიშვილი, ქართული ოცნება, მისი პრეზიდენტი, იყენებს საქართველოს კანონმდებლობას მისი პირადი ინტერესებისთვის და ეს იქნება კიდევ ერთი ნათელი მაგალითი მსოფლიოსთვის, დემოკრატიული სამყაროსთვის, რომ ეს ადამიანები რაც შეიძლება მალე უნდა მოვიშოროთ ხელისუფლებიდან.

გადაწყვეტილება არჩევნებთან დაკავშირებით მიღებული აქვს ძლიერი საქართველოს. სწორედ დღევანდელი ე.წ. პრეზიდნეტის გადაწყვეტილება იმაზე მეტყველებს, რომ აურზაური და დაპირისპირება შემოიტანოს ოპოზიციურ ფლანგზე, მინდა გიხრათ რომ მიუხედავად იმისა, რომ ბრძოლის ტაქტიკა გვაქვს სხვადასხვა მიზანი არის ერთი — ეს არის ევროპული მომავალი, ახალი საპარლამენტო არჩევნები და პოლიტპატიმრების გათავისუფლება. ამ მიზნისთვის ჩვენ არ გვიღალატია, ამ ბრძოლას გავაგრძელებთ, არჩევნებში მონაწილეობის მიღებაზე გადაწყვეტილება ჩვენ მივიღეთ მაშინ როდესაც უკვე ვიჯექით ციხეში," — განაცხადა მამუკა ხაზარაძემ.

რუსთავის ციხე დატოვა ლელო — ძლიერი საქართველოს ლიდერმა ბადრი ჯაფარიძემაც.

შეგახსენებთ, ოცნების დანიშნულმა პრეზიდენტმა მიხეილ ყაველაშვილმა დღეს დილით სოციალურ ქსელში დაწერა, რომ ლელო — ძლიერი საქართველოს ლიდერები მამუკა ხაზარაძე და ბადრი ჯაფარიძე შეიწყალა. მისი თქმით, ეს გადაწყვეტილება იმიტომ მიიღო, რომ "არავის დარჩეს იმის თქმის საბაბიც კი, რომ ადგილობრივი თვითმმართველობის არჩევნები შეზღუდული კონკურენტუნარიანობის პირობებში ტარდება".

ყაველაშვილი აღნიშნავს, რომ "შეთავაზებას შეწყალების შესახებ შესაბამისმა პატიმრებმა რამდენიმე კვირის წინ უარით უპასუხეს".

მამუკა ხაზარაძემ და ბადრი ჯაფარიძემ ციხეში 45 დღე გაატარეს. მათ ბრალი წულუკიანის კომისიაზე გამოუცხადებლობისთვის წარუდგინეს. ლელო — ძლიერი საქართველოს ლიდერებს 8-8-თვიანი პატიმრობა ჰქონდათ შეფარდებული.