"თუ მათ არ აქვთ [თავისუფლებაზე ყოფნის] სურვილი, ჩაიკეტონ და აღარ გამოვიდნენ", — ასე გამოეხმაურა თბილისის მერი და თვითმმართველობის არჩევნებში ქართული ოცნების თბილისის მერობის კანდიდატი კახა კალაძე ოცნების დანიშნული პრეზიდენტის, მიხეილ ყაველაშვილის მიერ ლელო — ძლიერი საქართველოს ლიდერების, მამუკა ხაზარაძისა და ბადრი ჯაფარიძის შეწყალებას.

მისი თქმით, ყაველაშვილის გადაწყვეტილება "ჰუმანური აქტია".

"ეს ჰუმანური აქტია პრეზიდენტის მიერ მიღებული გადაწყვეტილება. შეიწყალა 2 დამნაშავე. ზოგადად ციხეში არავის გაშვება არ მიხარია, რატომ უნდა გიხაროდეს ადამიანს ვიღაცის დაპატიმრება, მაგრამ მგონია, რომ უფრო მეტი პატივისცემა უნდა იყოს სახელმწიფო ინსტიტუციების მიმართ", — განაცხადა თბილისის მერმა, კახა კალაძემ.

დღეს, "ოცნების" დანიშნულმა პრეზიდენტმა, მიხეილ ყაველაშვილმა სოციალურ ქსელში დაწერა, რომ ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს იწყალებს. მისი თქმით, ეს გადაწყვეტილება იმიტომ მიიღო, რომ "არავის დარჩეს იმის თქმის საბაბიც კი, რომ ადგილობრივი თვითმმართველობის არჩევნები შეზღუდული კონკურენტუნარიანობის პირობებში ტარდება".