ოცნების ლიდერი მამუკა მდინარაძე სუს-ის ახალი უფროსი გახდა. ახალ პოსტზე მდინარაძის კანდიდატურას ოცნების პარლამენტის 85-მა წევრმა დაუჭირა მხარი.

ოცნების პარლამენტის თავმჯდომარემ შალვა პაპუაშვილმა მდინარაძეს პარლამენტში გაწეული საქმიანობისთვის მადლობა გადაუხდა და თქვა, რომ მამუკა მდინარაძე სახელმწიფო უსაფროების სამსახურის გამორჩეული ხელმძღვანელი იქნება.

"მოყვარემაც და რაც მთავარია მტრებმაც ძალიან კარგად იციან, თუ რა როლი ჰქონდა მამუკა მდინარაძეს საქართველოს პარლამენტში. ზუსტად ჩვენი ქვეყნის მოყვარეების სასიკეთოდ და მტრების საზიანოდ მამუკა მდინარაძე სახელმწიფო უსაფროების სამსახურის გამორჩეული ხელმძღვანელი იქნება. ის კიდევ უფრო გააძლიერებს იმ უსაფრთხოების სისტემას, რომელიც წლების განმავლობაში ჩამოყალიბდა და გვაძლევს შესაძლებლობას, რომ შევინარჩუნოთ მშვიდობა, კეთილდღეობის ზრდის ტემპები, რაც რეგიონულ გაურკვევლობებსა და ტურბულენტობებში გვაქვს", — განაცხადა პაპუაშვილმა.

მამუკა მდინარაძე სუს-ის უფროსის პოსტზე ოცნების პრემიერმინისტრმა, ირაკლი კობაიძემ 23 აგვისტოს წარადგინა. მანამდე სახელმწიფო უსაფრთხოების სამსახურმა გაავრცელა ინფორმაცია, რომ ანრი ოხანაშვილი სუს-ის უფროსის თანამდებობას ტოვებდა და ის ეროვნული უსაფრთხოების საკითხებში ოცნების პრემიერმინისტრის მრჩეველი გახდებოდა.