უკრაინის კრიზისის მოსაგვარებლად მისი გამომწვევი მიზეზების აღმოფხვრაა აუცილებელი, — განაცხადა რუსეთის პრეზიდენტმა ვლადიმერ პუტინმა. ამის შესახებ ინფორმაციას რუსული მედია ავრცელებს.

"რა თქმა უნდა, იმისათვის, რომ უკრაინის საკითხი საბოლოოდ მოგვარდეს, აუცილებელია კრიზისის ძირეული მიზეზების აღმოფხვრა, რომელზეც ახლახან ვილაპარაკე და ბევრჯერ მილაპარაკია, ასევე უსაფრთხოების სფეროში სამართლიანი ბალანსის აღდგენა," — განაცხადა პუტინმა შანხაის თანამშრომლობის ორგანიზაციის (SCO) სახელმწიფო მეთაურების საბჭოს სხდომაზე.

ცნობისთვის, პუტინის თვითმფრინავი ჩინეთის ქალაქ ტიანძინში, ბინჰაის აეროპორტში კვირას, 31 აგვისტოს, დილით დაეშვა.

რუსეთის ლიდერის ვიზიტი ჩინეთში პრეზიდენტ სი ძინპინის მოწვევით ოთხი დღე გაგრძელდება – 31 აგვისტოდან 3 სექტემბრამდე. რუსეთის პრეზიდენტის თანაშემწის, იური უშაკოვის თქმით, ერთ ქვეყანაში ასეთი ხანგრძლივი ვიზიტები ძალიან იშვიათია.

პუტინი მონაწილეობას მიიღებს შანხაის თანამშრომლობის ორგანიზაციის სამიტში, რომელიც ტიანძინში 31 აგვისტოდან 1 სექტემბრამდე გაიმართება.