საქართველოს საკონსტიტუციო სასამართლოს ორ მოსამართლეს — გიორგი კვერენჩხილაძესა და თეიმურაზ ტუღუშს, დღეიდან, 2 ოქტომბრიდან უფლებამოსილების 10-წლიანი ვადა ამოეწურათ. კვერენჩხილაძეს საკონსტიტუციო სასამართლოში გოგა კიკილაშვილი შეცვლის, ტუღუშს კი - სერგო მეთოფიშვილი.

"ამოიწურა ჩემი სამოსამართლო უფლებამოსილების 10-წლიანი ვადა. ვიტყვი მხოლოდ ერთს - გავაკეთე რაც შევძელი, სხვამ უკეთ გააკეთოს", - დაწერა გიორგი კვერენჩხილაძემ სოციალურ ქსელში.

აღსანიშნავია, რომ გიორგი კვერენჩხილაძემ და თეიმურაზ ტუღუშმა 2024 წელს იყვნენ ის მოსამართლეები, რომლებმაც რუსულ კანონთან დაკავშირებით კოლეგიისგან განსხვავებული მოსაზრება დააფიქსირეს. ისინი მიიჩნევდნენ, რომ რუსული კანონის ამოქმედება უნდა შეჩერებულიყო.

ცნობისთვის, გოგა კიკილაშვილი 22 სექტემბერს მიხეილ ყაველაშვილმა დანიშნა, სერგო მეთოფიშვილი კი უზენაესი სასამართლოს პლენუმმა აირჩია. ისინი 10 წლის ვადით დაინიშნენ.

კიკილაშვილი 2025 წლიდან იუსტიციის უმაღლესი საბჭოს არამოსამართლე წევრია, ხოლო მეთოფიშვილი მანამდე თბილისის სააპელაციო სასამართლოს საგამოძიებო კოლეგიის მოსამართლედ მუშაობდა. 2021-2025 წლებში კი იყო თბილისის საქალაქო სასამართლოს საგამოძიებო, წინასასამართლო სხდომისა და არსებითი განხილვის კოლეგიის მოსამართლე და თავმჯდომარე.