"დღეს მოდის დრო საზოგადოებისთვის, რომ მივხვდეთ, შეგუება ნიშნავს, რომ ჩვენ ამ ქვეყანას ჩავაბარებთ რუსეთს და არა მგონია, საქართველო მზად იყოს ამისთვის. მე ეს რომ მჯეროდეს, აქ არ ვიქნებოდი, მე მჯერა, რომ საქართველო არასოდეს არ ჩაბარდება," — ამის შესახებ საქართველოს მე-5 პრეზიდენტმა, სალომე ზურაბიშვილმა გუშინ, 27 აგვისტოს გამართულ ბრიფინგზე განაცხადა, რომელიც 7 არასამთავრობო ორგანიზაციის ანგარიშების დაყადაღებას ეხებოდა.

სალომე ზურაბიშვილის განცხადებით, ის, რაც დღეს არასამთავრობოების მიმართ ხდება, "არის სწორედ რეპრესიული რეჟიმის ფორმა, რომელიც ვნახეთ ადრე რუსეთში"

"არ შეიძლება, ყველას არ გვესმოდეს დღეს, რომ კიდევ ერთი ნაბიჯით ამ ხელისუფლებამ საქართველო წაიყვანა რუსულ მოდელზე და რუსული რეჟიმის ჩამოყალიბება გრძელდება ძალიან სწრაფი ტემპით.

ის, რაც ხდება დღეს არასამთავრობოების მიმართ და ის ბრალდებები, რაც არის წამოყენებული სრულიად აბსურდამდე მისული, საბოტაჟი და რაღაცები, არც მინდა, რომ გავიმეორო, არის მხოლოდ და მხოლოდ, სწორედ რეპრესიული რეჟიმის ფორმა, რომელიც ვნახეთ ადრე რუსეთში. ერთადერთი ის არის, რომ საქართველოში ეს ყველაფერი ბევრად უფრო სწრაფად კიდევ ვითარდება, ვიდრე თავის დროზე რუსეთში.

ჩვენ ახლა შუაგულ ზაფხულში, ვხედავთ ამ შეტევას არასამთავრობოებზე, მეორე მხრივ, უკვე ცხრა თვის დაპატიმრების შემდგომ გადავდივართ დასკვნით პროცესებზე და აქაც მძიმე ბრალდებებით, სრულიად უსაფუძვლო, სრულიად აბსურდული, არანაირი არცერთი მხრივ მტკიცებულება არ არსებობს და თურმე ამას უნდა შევეგუოთ.

მე მგონი, რომ დღეს მოდის დრო საზოგადოებისთვის, რომ მივხვდეთ — შეგუება ნიშნავს, რომ ჩვენ ამ ქვეყანას ჩავაბარებთ რუსეთს და არა მგონია, საქართველო მზად იყოს იმისთვის, რომ ჩაბარდეს. მე ეს რომ მჯეროდეს, აქ არ ვიქნებოდი, მე მჯერა, რომ საქართველო არასოდეს არ ჩაბარდება…

მაგრამ ეს ჩქარი ტემპი ამავე დროს იყო რაღაცნაირად ეტაპობრივი, ხან პოლიტიკური ლიდერები დაიჭირეს, ხან აქტივისტები, ეხლა ენჯეოები, მერე ბიზნესებს მიმართეს და დაიწყო მათზე ასევე ზეწოლა, ეს არის ძალიან კარგად მოფიქრებული რუსული სტრატეგია, შესრულებული ამათ მიერ, ვიღაც-ვიღაცების მიერ, მაგრამ სტრატეგია სხვაგან არის გაწერილი და ჩვენ ამას ვეჭიდებით.

არ არის მარტივი, ჩვენ არ გვყავს ზურგში ძლიერი პარტნიორები ამ დროს, რაც არ უნდა ესე ლაპარაკობდნენ, რაღაცა ომის პარტიაზე, არ არსებობს ეს ომის პარტია, არსებობს საქართველო, მუდმივი საქართველო, რომელიც ებრძვის რუსეთს, როგორც არაერთხელ მის ახლო ისტორიაში და უნდა თავი დაიცვას, უნდა გადაარჩინოს თავისი დამოუკიდებლობა, ეს არის დღეს ჩვენი ამოცანა, ყველასი ერთად, საზოგადოების. აქ არ არის ლაპარაკი რომელიმე პოლიტიკურ პარტიაზე, ჩვენ ერთად ვებრძვით ამას და ჩვენ ერთად უნდა გადავარჩინოთ ჩვენი მომავალი," — განაცხადა სალომე ზურაბიშვილმა.

ბრიფინგზე საქართველოს მეხუთე პრეზიდენტმა იმ პოლიტიკურ პარტიებსაც მიმართა, რომლებიც ოცნების ცესკოს მიერ დანიშნულ ადგილობრივ თვითმმართველობის არჩევნებში მონაწილეობენ.

"ამ დროს არ შეიძლება, რომ მე არ მივმართო იმ პარტიებს, რომლებიც დღეს თამაშობენ რაღაცა ადგილობრივ არჩევნებში მონაწილეობას, რაღაც კამპანიას. სად ვართ, სად არის ქვეყანა და სად არის რაღაც კამპანია, რომ ვინმე დავარწმუნოთ იმაში, რომ ადგილობრივი არჩევნები რამეს შეცვლის ან ვინმე რამეს მიაღწევს ამ არჩევნებში.

ჩვენი ამოცანა დღეს არის ნამდვილად ქვეყნის მომავლის ამოცანა, ქვეყნის მომავლის გადარჩენა, საქართველოს დამოუკიდებლობის გადარჩენა, ეს არის ჩემი გზავნილი ამ ზაფხულის დასასრულს," — განაცხადა სალომე ზურაბიშვილმა.

ასევე იხილეთ: