არასამთავრობო ორგანიზაცია "სამართლიანი არჩევნების საერთაშორისო საზოგადოების"(ISFED) ყოფილი აღმასრულებელი დირექტორი ნინო დოლიძე 7 NGO-ს დაყადაღებას სოციალურ ქსელში ეხმაურება. მისი თქმით, პროკურატურის ამ ნაბიჯის რეალური მიზეზი ბიძინა ივანიშვილისა და მისი გუნდის სამოქალაქო საზოგადოების განადგურებისკენ სწრაფვაა.

"დღეს ისფედი და კიდევ 6 ქართული არასამთავრობო ორგანიზაცია დააყადაღეს.
პროკურატურის განცხადებაში ნახსენები ბრალდება იმდენად აბსურდულია, გამეორებაც არ მინდა.

რეალური მიზეზი ყველამ ვიცით, ბიძინა ივანიშვილის და მისი გუნდის დაუოკებელი სწრაფვა, გაანადგუროს სამოქალაქო საზოგადოება ქვეყანაში.

აუცილებლად დადგება დრო, როდესაც ამ უსაზღვრო უსამართლობას პასუხი გაეცემა. ჩემი მხარდაჭერა ყველა ორგანიზაციას!" — დაწერა ნინო დოლიძემ.

ცნობისთვის, პროკურატურის ინფორმაციით, 27 აგვისტოს ყადაღა დაედო 7 არასამთავრობო ორგანიზაციების საბანკო ანგარიშებს, რითაც შეიზღუდა ფულადი სახსრების შემდგომი არამიზნობრივი განკარგვა.

NGO-ებს ყადაღა საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების წინააღმდეგ მიმართული საქმიანობისთვის ფინანსების მობილიზების ფაქტზე პროკურატურაში მიმდინარე გამოძიების ფარგლებში დაედოთ.

პროკურატურის ცნობით, ამ არასამთავრობო ორგანიზაციების "ფინანსები გამოყენებული იქნა ისეთი აღჭურვილობის შესაძენად, როგორიც არის — სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები".

არასამთავრობო ორგანიზაციებმა ანტიკორუფციული ბიუროს წინააღმდეგ თბილისის საქალაქო სასამართლოსი სარჩელი შეიტანეს. ამის შესახებ არასამთავრობო ორგანიზაციების წარმომადგენლებმა დღეს ერთობლივი ბრიფინგზე განაცხადეს. ისინი ანტიკორუფციული ბიუროს ხელმძღვანელის რაჟდენ კუპრაშვილის 31 მაისის ბრძანების ბათილად ცნობას ითხოვენ, რომლის საფუძველზეც მათ მიმართ მოკვლევა მიმდინარეობს.