"საქართველოს ახალგაზრდა იურისტთა ასოციაციის" თავმჯდომარე, ნონა ქურდოვანიძე 7 NGO-ს დაყადაღებას სოციალურ ქსელში ეხმაურება. მისი თქმით, პროკურატურა დანაშაულად აცხადებს აქციების დროს დაკავებული ადამიანების სამართლებრივ დახმარებას და მისი აზრით, რეპრესიების შემდეგი სამიზნე დამოუკიდებელი ადვოკატები იქნებიან.

"დაიწყო რეპრესიების ახალი ეტაპი. პროკურატურამ აბსურდული ბრალდებით დააყადაღა 7 ორგანიზაციის საბანკო ანგარიშები და ფაქტობრივად თითქმის შეუძლებელი გახადა საქმიანობის გაგრძელება. მიუხედავად იმისა, რომ ,"ქართულ ოცნებას" მიღებული აქვს და მოქმედებაშია მოყვანილი სამოქალაქო საზოგადოების შემზღუდველი 3 კანონი, დღევანდელი
გადაწყვეტილება ამ კანონებს არ ეფუძნება. პროკურატურას გამოძიება დაწყებული აქვს სისხლის სამართლის კოდექსის ბევრად უფრო მძიმე მუხლებით. ამ გამოძიების ფარგლებში შემდგომი ნაბიჯები შეიძლება კიდევ უფრო რეპრესიული გახდეს.

პროკურატურა დანაშაულად აცხადებს აქციების დროს დაკავებული ადამიანების სამართლებრივ დახმარებას. ის, რომ არავინ დარჩეს დაუცველი და დაკავებულს სასამართლოში წარმოადგენდეს მისთვის სანდო ადვოკატი, პირველ რიგში, მართლმსაჯულების ინტერესებში უნდა შედიოდეს და დღეს პროკურატურამ სასამართლოს ხელით მართლმსაჯულების ინტერესებში მოქმედება დანაშაულად აქცია. როგორც ჩანს, რეპრესიების შემდეგი სამიზნე დამოუკიდებელი ადვოკატები იქნებიან.

რაც შეეხება აირწინაღებს, თუ რომელიმე ორგანიზაცია აირწინაღს აძლევს თავის თანამშრომელს, რომელიც ველზე მუშაობს და მონიტორინგის პროცესშია ჩართული, ეს სისხლის სამართლის დანაშაული კი არა, საქართველოს შრომის კოდექსის დაცვაა.

სრული მხარდაჭერა ჩვენს კოლეგებს", — დაწერა ნონა ქურდოვანიძემ.

ცნობისთვის, პროკურატურის ინფორმაციით, 27 აგვისტოს ყადაღა დაედო 7 არასამთავრობო ორგანიზაციების საბანკო ანგარიშებს, რითაც შეიზღუდა ფულადი სახსრების შემდგომი არამიზნობრივი განკარგვა.

NGO-ებს ყადაღა საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების წინააღმდეგ მიმართული საქმიანობისთვის ფინანსების მობილიზების ფაქტზე პროკურატურაში მიმდინარე გამოძიების ფარგლებში დაედოთ.

პროკურატურის ცნობით, ამ არასამთავრობო ორგანიზაციების "ფინანსები გამოყენებული იქნა ისეთი აღჭურვილობის შესაძენად, როგორიც არის — სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები".

არასამთავრობო ორგანიზაციებმა ანტიკორუფციული ბიუროს წინააღმდეგ თბილისის საქალაქო სასამართლოსი სარჩელი შეიტანეს. ამის შესახებ არასამთავრობო ორგანიზაციების წარმომადგენლებმა დღეს ერთობლივი ბრიფინგზე განაცხადეს. ისინი ანტიკორუფციული ბიუროს ხელმძღვანელის რაჟდენ კუპრაშვილის 31 მაისის ბრძანების ბათილად ცნობას ითხოვენ, რომლის საფუძველზეც მათ მიმართ მოკვლევა მიმდინარეობს.