ამერიკის შეერთებული შტატების ვიცეპრეზიდენტმა ჯეი დი ვენსმა NBC News-თან მიცემულ ინტერვიუში უკრაინის უსაფრთხოების გარანტიებზე ისაუბრა და განაცხადა, რომ ამერიკელი ჯარისკაცები უკრაინის ტერიტორიაზე არ იქნებიან.

"პრეზიდენტმა ტრამპმა ძალიან მკაფიოდ განაცხადა — უკრაინაში ამერიკელი ჯარისკაცები არ იქნებიან. თუმცა, ჩვენ გავაგრძელებთ აქტიური როლის შესრულებას იმის უზრუნველსაყოფად, რომ უკრაინელებს ჰქონდეთ უსაფრთხოების გარანტიები და ნდობა, რაც მათ სჭირდებათ ომის შესაჩერებლად", — თქვა ვიცეპრეზიდენტმა.

ჯეი დი ვენსმა ასევე აღნიშნა, რომ რუსეთის მხარე გარკვეულ გარანტიებს იძლევა უკრაინის ტერიტორიულ მთლიანობასთან დაკავშირებით.

"მათ აღიარეს, რომ ვერ შეძლებენ მარიონეტული რეჟიმის დამყარებას კიევში. ეს, რა თქმა უნდა, ერთ-ერთი მთავარი მოთხოვნა იყო თავიდანვე. და რაც მთავარია, მათ ასევე აღიარეს, რომ იქნება გარკვეული უსაფრთხოების გარანტია უკრაინის ტერიტორიული მთლიანობისთვის", — აღნიშნა ჯეი დი ვენსმა.