გორის საკრებულოს თავმჯდომარე, დავით რაზმაძე NYT-ის ჟურნალისტს, სკოტ ანდერსონს ინფორმაციის გაყალბებაში ადანაშაულებს. ის "ტვ პირველთან" სატელეფონო საუბრისას ამბობს, რომ ის, რა New York Times-ის ინტერვიუში წერია "თავიდან ბოლომდე ცილისწამება და სიცრუეა".

"ეს არის ცილისწამება და სიცრუე თავიდან ბოლომდე. აბსოლუტურად. იმიტომ, რომ ჩემს ცხოვრებაში მე რუსეთზე არასოდეს დადებითი არ მითქვია, რაც არის აღნიშნული — "სააკაშვილის ხულიგნები" — არანაირი მაგის მსგავსი არ მიხსენებია; მე ვახსენე, რომ სააკაშვილის ხელისუფლებამ მიატოვა ქალაქი და იმ ნაძირალა კაცმა, რომელმაც ჩემგან ინტერვიუ აიღო აღმოჩნდა ფაქტიურად სააკაშვილის და მაგ ნაძირლების ადვოკატია. თუ ჩემი თანაგუნდელები დამიდგებიან გვერდში, ვუჩივლებ, რა თქმა უნდა", — აცხადებ რაზმაძე (სტილი დაცულია).

ჟურნალისტის კითხვაზე, "თქვენთვის მიუღებელია ევროკავშირში ინტეგრაცია?", რაზმაძე ამბობს, რომ ეს "სისულელეა" და გამოცემა New York Times-ს დამახინჯებულად "ევრო თაიმსს" უწოდებს..

"ეგეც სისულელეა, მე ვარ ქართული ოცნების წევრი. ქართული ოცნება როდესმე აფიქსირებს, რომ ჩვენ ევროინტეგრაციის წინააღმდეგი ვართო? იმ ნაძირალა კაცს, საერთოდ ეჭვი მეპარება, რომ წარმოადგენდა "ევრო თაიმსს".

სააკაშვილს ომის დაწყებაში როგორ დავადანაშაულებ, რუსებმა დაიწყეს ომი. ომის ხელშეწყობაში ვადანაშაულებ. არავინ არ ადანაშაულებს. ეგ არის თითიდან გამოწოვილი. სააკაშვილმა ხელი შეუწყო ქართული ტერიტორიების ანექსიას", — ამბობს რაზმაძე (სტილი დაცულია).

გორის საკრებულოს თავმჯდომარემ ქართული ოცნებიდან დავით რაზმაძემ New York Times-თან ინტერვიუში განაცხადა, რომ ისინი [რუსები] აქ მშვიდობისმყოფელებად მოვიდნენ და მადლობა ღმერთს, რომ ასე მოიქცნენ, რადგან მიშას ხულიგნები მთელ ქალაქს ძარცვავდნენ.

• დავით რაზმაძე: როგორც საბჭოთა კავშირი დაინგრა, ახლა მინდა ვნახო ევროკავშირის დაცემა, რადგან ის ჩვენს წინააღმდეგაა

რაც შეეხება New York Times-ის ჟურნალისტს, სკოტ ანდერსონს, რომელმაც ინტერვიუს ჩაწერა გორის საკრებულოს თავმჯდომარე, დავით რაზმაძესთან, ის გამოცდილი სამხედრო კორესპონდენტია. თავისი ჟურნალისტური კარიერის განმავლობაში მუშაობდა ლიბანიდან, ისრაელიდან, ეგვიპტიდან, ჩრდილოეთ ირლანდიიდან, ჩეჩნეთიდან, სუდანიდან, ბოსნიიდან, ელ სალვადორიდან და სხვა მრავალი კონფლიქტით დაზარალებული ქვეყნიდან. ის ხშირად წერდა New York Times Magazine-ში, ასევე Vanity Fair-ში, Esquire-ში, Harper’s-სა და Outside-ში.

ამა ს გარდა, სკოტ ანდერსონ არის რომანების Moonlight Hotel და Triage-ის, ასევე არამხატვრული წიგნების The Man Who Tryed to Save the World და The 4 O’Clock Murders-ის ავტორი, ასევე ძმასთან, ჯონ ლი ანდერსონთან ერთად არის War Zones-ისა და Inside The League-ის თანაავტორი.