საზოგადოებრივი მეცნიერებების ახალი საგნის "მე და საზოგადოება" საპილოტე სწავლება თბილისის 150-ე საჯარო სკოლაში მიმდინარე კვირაში დაიწყება. სკოლამ ეროვნულ სასწავლო გეგმაზე დაყრდნობით, სახელმძღვანელოს გარეშე მოამზადა პირველი თემა, რომელიც 7-8 გაკვეთილის განმავლობაში გაგრძელდება და მხოლოდ სადამრიგებლო საათებს დაიკავებს. "მე და საზოგადოება" მე-3 და მე-4 კლასებისთვის არის განკუთვნილი.

განათლების სამინისტროს ეროვნული სასწავლო გეგმების სამმართველოს უფროსმა მარიამ ჩიქობავამ On.ge-ის განუცხადა, რომ სკოლის ინიციატივით, პირველ გაკვეთილს მშობლებიც დაესწრებიან:

"პირველი გაკვეთილის ჩატარება უნდათ მშობლებთან ერთად, რადგან სხვადასხვაგვარი ინტერპრეტაცია იყო თავიდან ამ თემაზე. ახალი საგანია და ალბათ გსმენიათ, თითქოს რაღაც მამათმავლობების სწავლება გვინდა. პედაგოგები მშობლებს გააცნობენ მიზნებსა და მოლოდინებს".

ანალოგიურად, საპილოტე რეჟიმში სწავლება დაგეგმილია რეგიონებშიც, კერძოდ, რუსთავის, საგარეჯოსა და მანავის სკოლებში. ჯამში ხუთი საპილოტე და ათი ქსელი სკოლა, სამინისტრომ იმ კრიტერიუმით შეარჩია, ჰქონდათ თუ არა მონაწილეობა მიღებული სხვადასხვა უწყებების პროექტებში ან რამდენად ხშირად იჩენდნენ ინიციატივებს.

მარიამ ჩიქობავა ამბობს, რომ მაგალითისთვის, საგარეჯოს პირველმა სკოლამ მშობლების ინფორმირებისთვის საგნის ბანერები გააკეთა და გამოფინა დერეფანში.

"მე და საზოგადოების" სახელმძღვანელოზე ამჟამად 7-8 საავტორო ჯგუფი მუშაობს, რომელთაგან განათლების სამინისტროს სპეციალური კომისია შეარჩევს ერთ-ერთს. საქართველოს სკოლებში საგნის სრულად დანერგვა 2018-19 სასწავლო წლისათვის არის დაგეგმილი.

გასული წლების განმავლობაში, აქტიური დისკუსია მიმდინარეობდა, უნდა დანერგილიყო თუ არა სკოლაში აღნიშნული საგანი. საზოგადოების გარკვეული ნაწილი საჯაროდ დაუპირისპირდა ახალ საგანს. მოწინააღმდეგეებს შორის იყვნენ, საპატრიარქო და დემოგრაფიული განვითარების ფონდის სამეთვალყურეო საბჭოს თავმჯდომარე ლევან ვასაძე, რომელიც ანტიევროპული და ჰომოფობიური გამონათქვამებით გამოირჩეოდა.

"განათლების სამინისტრო ევროკავშირის დავალებით სექტემბრიდან ჩვენ შვილებზე მასირებული შეტევის განხორციელებას აპირებს - ახალი სავალდებულო საგნების "მე და საზოგადოება" და "ჩემი საქართველო"-ს მიზანი იქნება დაწყებით კლასებში, 7-13 წლამდე ბავშვების, ერთის მხრივ, ბილწი და უსაშინლესი მამათმავლური ცნობიერებით მოწამვლა, გარყვნა და, მეორეს მხრივ, მათი სარწმუნოებრივ-ეროვნული ცნობიერების გადაგვარება და აღრევა", - ასე იწყება გაზეთ კვირის პალიტრაში გამოქვეყნებული წერილი სახელწოდებით "განგაშის ზარები", რომელსაც სხვა ცნობილ ადამიანებთან ერთად ხელს ლევან ვასაძეც აწერს.

საგნის "მე და საზოგადოება" პროექტი განათლების სამინისტრომ მოამზადა. მის ფარგლებში ინტეგრირებულია ისტორიის, გეოგრაფიისა და სამოქალაქო განათლების საკითხები. პროექტის თანახმად, საგანი ორიენტირებულია მოსწავლემ ჩამოაყალიბოს დამოკიდებულებები ქვეყნის, ოჯახის, თემისა და მეგობრების მიმართ.