რუსეთის ფედერაციის ჩრდილოეთ ოსეთის რესპუბლიკის მეთაურმა, სერგეი მენიაილომ დაადასტურა, რომ 25 დეკემბერს ვლადიკავკაზის სავაჭრო ცენტრში მომხდარი აფეთქება დრონებით თავდასხმის შედეგი იყო.

მენიაილომ ტელეგრამზე დაწერა, რომ თავდაცვის სამინისტროს მონაცემებით, აფეთქება და ხანძარი განეიტრალებული უპილოტო საფრენი აპარატის ნამსხვრევებმა გამოიწვია. ის წერს იმასაც, რომ დრონებით შეტევა განხორციელდა ჩრდილოეთ კავკასიის ფედერალური ოლქის ზოგიერთ სხვა რეგიონზეც.

თავდაპირველი ვერსიით, სავაჭრო ცენტრში აფეთქება გაზის გაჟონვამ გამოიწვია. ჩრდილოეთ ოსეთის ხელისუფლების ცნობით, ვლადიკავკაზის სავაჭრო ცენტრ "ალანია მოლში" მომხდარი აფეთქების შედეგად ერთი ადამიანი დაიღუპა.

ჯერჯერობით, უკრაინის თავდაცვის ძალები ჩრდილოკავკასიაზე დრონებით თავდასხმის შესახებ კომენტარს არ აკეთებენ.