გლდანის ციხეში თანაინვესტირების ფონდის ყოფილი ხელმძღვანელი, გიორგი ბაჩიაშვილს სცემეს.

მედიაში გავრცელებული ინფორმაციით, ბაჩიაშვილს სხეულზე მრავლობითი დაზიანებები აღენიშნება.

NEWS.On.ge-ს ბაჩიაშვილის ადვოკატმა დავით ჯანდიერმა უთხარა, რომ მისი დაცვის ქვეშ მყოფი ციხის მე-18 სამკურნალო დაწესებულებაშია გადაყვანილი.

მან ცოტა ხნის წინ სოციალურ ქსელში დაწერა, რომ გიორგი ბაჩიაშვილის სახელით რამდენიმე წუთში გაავრცელებენ ინფორმაციას.

"გიორგი ბაჩიაშვილის სახელით რამდენიმე წუთში გავავრცელებთ ბოლო დღეებში განვითარებულ, მძიმე მოვლენათა შესახებ ინფორმაციას", — წერს დავით ჯანდიერი.

როგორც ზურაბ ჩხაიძე ნეტგაზეთთან ამბობს, ბაჩიაშვილი "ვივამედში" პარასკევს, 11 ივლისს შეიყვანეს და გლდანის ციხეში რამდენიმე საათში დააბრუნეს.

"პარასკევს მოიყვანეს ჩვენთან კლინიკაში. იყო სხეულის დაზიანებები სხვადასხვა ადგილზე. სხვადასხვა არეში ჭრილობები, ღია ჭრილობები თავის არეში.

გაეწია შესაბამისი სამედიცინო დახმარება, კონსულტირებული იქნა ექიმი ნევროლოგის მიერ და მისივე რეკომენდაციით, პაციენტი დაბრუნებული იქნა პენიტენციურ დაწესებულებაში პენიტენციური დაწესებულების ექიმის მეთვალყურეობის ქვეშ. კლინიკაში შემოსვლიდან რამდენიმე საათში დაბრუნდა პენიტენციურ დაწესებულებაში", — აცხადებს ზურაბ ჩხაიძე.

NEWS.On.ge პენიტენციურ დაწესებულებასთან ცდილობს ინფორმაციის გადამოწმებას.