თანაინვესტირების ფონდის ყოფილი ხელმძღვანელის, გიორგი ბაჩიაშვილის ადვოკატებმა, ლევან მახარაშვილმა ჟურნალისტებთან საუბრისას განაცხადეს, რომ მათ პროკურატურას გამოძიებისთვის მიმართეს. ლევან მახარაშვილის განცხადებით, ბაჩიაშვილს, სავარაუდოდ, ტვინის შერყევა აქვს მიღებული და მიყენებული დაზიანებების გამო ნაკერები დაადეს.

"მიყენებული დაზიანებების შემდეგ მას დამოუკიდებლად გადაადგილება უჭირს. შესაბამისად ის ეტლით გადაადგილდება. სავარაუდოდ, მას აქვს ტვინის შერყევა, ვინაიდან მოტორიკა აქვს შენელებული, მათ შორის საუბრის დროს. ამის გარდა, აღიზიანებს მკვეთრი შუქი, როგორც თავად განმარტა, აქვს თავის ტკივილები და ღებინების შეგრძნება. ეს ყველაფერი მას განუვითარდა გონების დაკარგვიდან ძალიან ხანმოკლე პერიოდში. მას არაერთი დაზიანების კვალი აღენიშნება, კერძოდ სისხლჩაქცევების სახით. თავზე მას სპეციალური ბინტით გადახვევა ჰქონდა გაკეთებული, მაგრამ როგორც განმარტა გასაუბრებისას, რამდენიმე ადგილზე ნაკერები აქვს.

გუშინ უკვე მივმართეთ გენერალურ პროკურატურას და მოვითხოვეთ, რომ გამოძიება ჩაატაროს, ვინაიდან მოგეხსენებათ სპეციალური საგამოძიებო სამსახური აღარ არსებობს. ხოლო, ამ საქმეში, გიორგის განცხადებაში პენიტენციური დეპარტამენტის, მე-8 დაწესებულების დირექტორი ფიგურირებს. შესაბამისად, ობიექტურად გამოვლინდეს ყველა დეტალი, მიგვაჩნია, რომ ნეიტრალურმა საგამოძიებო სტრუქტურამ უნდა აწარმოოს გამოძიება — ამ შემთხვევაში ეს არის პროკურატურა," — განაცხადა ლევან მახარაშვილმა ტვ პირველთან საუბრისას.

მახარაშვილმა ასევე დასძინა, რომ ბაჩიაშვილი მზად არის გამოძიების დაწყების შემთხვევაში პროკურატურასთან ითანამშრომლოს. ადვოკატი დავით ჯანდიერის განცხადებით, გამოძიება ნეიტრალური მტკიცებულებების გამოყენებით უნდა ჩატარდეს, რაც არის საკანში ვიდეოკამერები. ადვოკატმა ასევე დასძინა, რომ მე-18 დაწესებულების დატოვების შემდეგ, ისინი ბაჩიაშვილი საკანში მარტო ყოფნას მოითხოვენ.

"ამ ეტაპზე ძალიან მნიშვნელოვანი არის, ნებისმიერი მოქმედება იქნეს განხორციელებული, რაც გამოძიების ფარგლებში შესაძლებელს გახდის ჭეშმარიტება დადგინდეს, მათ შორის ნეიტრალური მტკიცებულებების გამოყენებით. საუბარი არის ვიდეოკამერების ჩანაწერების ამოღებაზე, რაც სახალხო დამცველის ოფისმაც მოითხოვა. ჩვენც ვაპირებთ დავაყენოთ მოთხოვნა იმასთან დაკავშირებით, რომ გიორგი მე-18 დაწესებულებას, რომ დატოვებს საკანში მარტო იყოს, რათა ის რისკები, რაც არსებობს მისი ჯანმრთელობასთან და უსაფრთხოებასთან დაკავშირებით არის როგორც ჩანს უკვე გაათმაგებული," — განაცხადა დავით ჯანდიერმა.

14 ივლისს გავრცელდა ინფორმაცია, რომ თანაინვესტირების ფონდის ყოფილი ხელმძღვანელი გიორგი ბაჩიაშვილი გლდანის ციხეში სცემეს. თანაინვესტირების ფონდის ყოფილი ხელმძღვანელი წერილში წერს, რომ 8 ივლისს მე-8 დაწესებულების ხელმძღვანელმა, დავით გოგობერიშვილმა მოინახულა და ურჩია, რომ "ივანიშვილისთვის მთელი მისი საბანკო ანგარიშები, კრიპტოვალუტების ბრუნვები და ანგარიშის მისამართები გაეხსნა". მას შემდეგ რაც ბაჩიაშვილისგან უარი მიიღო, დაემუქრა. 11 ივლისს კი ის საკანში უცნობმა პირმა სცემა.